Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 294 Hüküm no: 300 Orijinal metin no: [41a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gönye kasabasından Ayşe bt. Molla Ali’yi bırakıp İstanbul’a giden kocası Ali Beşe b. Hasan’ın ödemesi şartıyla Ayşe Hanım’a nafaka takdir edildiği Vilâyet-i Anadolu’da Gönye kasabasında sâkine Âişe bt. Molla Ali b. Ebûbekir nâm hatun tarafından husûs-ı âti’l-beyâna vekîl olduğu zât-ı mezbûreyi ma‘rifet-i şer‘iyye ile ârifân Ali Beşe b. Hüseyin ve Hasan b. İslam şehâdetleriyle şer‘an sâbit olan Ali Beşe b. Mustafa nâm kimesne meclis-i şer‘-i şerîf-i enverde müvekkile-i mezbûre Âişe Hatun’un zevc-i dâhili diğer Ali Beşe b. Hasan mahzarında bi’l-vekâle takrîr-i kelâm ve tâʻbir ani’l-merâm edip merkūm diğer Ali Beşe müvekkilem zevcesi merkūme Âişe Hatun’u bilâ-nafaka bırakıp hâlâ İstanbul’da mütemekkin olmağla mezbûre Âişe Hatun’un nafaka ve sâir levâzım-ı mühimmesiʼçün zevci işbu mezbûr diğer Ali Beşe üzerine kıbel-i şer‘den kadr-i kifâye nafaka farz ve takdîr olunmak bi’l-vekâle matlûbumdur dedikde gıbbe’t-tasdîkı’l-mer‘î hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi müvekkile-i mezbûre Âişe Hatun’un nafaka ve sâir levâzım-ı mühimmesiʼçün târih-i kitâbdan tarafeynin rızâsıyla zevci mezbûr diğer Ali Beşe üzerine yevmî altı akçe nafaka farz ve takdîr edip meblağ-ı mefrûz-ı mezbûru levâzım-ı zarûriyyesine harc u sarfa ve lede’l-iktizâ istidâneye ve inde’z-zafer zevci mezbûr Ali Beşe üzerine rücû‘a merkūme Âişe Hatun’a izin vermeğin mâ-vaka‘a bi’t-taleb ketb olundu. Fî 25 min-Cumâdelûlâ sene 1121 Şuhûdü’l-hâl: Hasan Beşe b. İslam, Ahmed b. Ali, Hasan Bey b. Abdullah, Mustafa b. Bayram ve gayruhum mine’l-huzzâr.