Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 294 Hüküm no: 301 Orijinal metin no: [41a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şehbaz bt. Abdullah’ın Çukurbostan Mahallesi’ndeki evinin yarısını kocası Ömer b. Pîrî’ye sattığı Mahmiye-i İstanbul’da Sultan Selim Hân Câmi‘-i şerîfi kurbünde Çukurbostan Mahallesi sükkânından Şehbaz bt. Abdullah nâm hatun zâtı ba‘de’t-ta‘rîfi’ş-şer‘î meclis-i şer‘-i şerîf-i enverde zevci işbu sâhibü’l-kitâb Ömer b. Pîrî mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup mahalle-i mezbûrede vâki‘ iki tarafdan el-Hâc Mustafa mülkü ve bir tarafdan Abaza Mehmed Çelebi mülkü ve bir tarafdan tarîk-i hâs ile mahdûd bir bâb fevkānî oda ve bir sofa ve bir tahta-pûş ve iki bâb tahtânî oda ve bir sofa ve bir mikdâr havluyu müştemil mülk menzilimin nısf-ı şâyi‘ini bi-cümleti’t-tevâbi‘ ve’l-levâhık tarafeynden îcâb ve kabûlü hâvî bey‘-i bâtt-ı sahîh-i şer‘î ile yetmiş guruşa zevcim mezbûr Ömer’e bey‘ ve teslîm ve temlîk eylediğimde ol dahi ber-vech-i muharrer iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr yetmiş guruşu zevcim mezbûr Ömer yedinden tamamen ahz u kabz eyledim baʻde’l-yevm menzil-i mahdûd-ı mezkûrun nısf-ı şâyi‘i cemî‘ müştemilâtıyla zevcim mezbûr Ömer’in mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 min-Cumâdelâhire sene 1121 Şuhûdü’l-hâl: Mehmed Efendi b. ( ) el-Müezzin, Hüseyin Efendi b Mehmed el-Müezzin, Hüseyin Çelebi b. ( ) el-Kasab, Abdurrahman b. Hüseyin, Mehmed b. Abdullah, Kara Mustafa b. Mehmed, Süleyman b. Abdullah, Derzi Mustafa b. Abdullah, Abdullah b. Mustafa, Ali Beşe b. Abdullah ve gayruhum mine’l-huzzâr.