Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 298 Hüküm no: 307 Orijinal metin no: [42a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Hacı Mehmed Ağa’nın geçinemediği kocası Ali Efendi b. Abdullah’dan boşandığı Husûs-ı âti’z-zikrin mahallinde ketb ü tahrîri [için] savb-ı şer‘-i şerîf-i enverden Mevlânâ Ali Efendi b. Mustafa irsâl olunup ol dahi mahmiye-i İstanbul’da Hüsrev Paşa Türbesi kurbünde vâki‘ Kasab İvaz Mahallesi’nde sâkine Hadice bt. el-Hâc Mehmed Ağa nâm hatunun menziline varıp zeyl-i rakīmde muharrerü’l-esâmî Müslimîn huzûrlarında akd-i meclis-i şer‘-i şerîf eyledikde mezbûre Hatice’nin zâtı karındaşı el-Hâc Mustafa b. el-Hâc Mehmed ve Müezzin Mehmed Efendi b. Yusuf ta‘rîfleriyle mu‘arrefe oldukdan sonra meclis-i ma‘kūd-ı mezbûrda mezbûre Hadice’nin zevc-i dâhili olup sâbıkā başyazıcı olan fahrü’l-eşbâh işbu râfi‘u’r-rakīm Ali Efendi b. Abdullah mahzarında bi-tav‘ihâ ikrâr ve takrîr-i kelâm edip merkūm Ali Efendi zevcim olup beynimizde hüsn-i zindegānemiz olmamağile zimmetinde mütekarrer ve ma‘kūdün-aleyh olan beş yüz guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Ali Efendi ile muhâla‘a-i sahîha-i şer‘iyye ile muhâla‘a olduğumda ol dahi ber-vech-i muharrer üzere hul‘-ı mezkûru kabûl ettiğinden sonra hukūk-ı zevciyete ve sâir beynimizde cereyân eden ahz u i‘tâya ve bi’l-cümle hukūk-ı ma‘lûme ve mechûleye müte‘allika olan âmme-i da‘vâdan târih-i kitâba gelince her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dedikde gıbbe’t-tasdîkı’ş-şer‘î vâki‘ hâli merkūm Ali Efendi mahallinde tahrîr ba‘dehû ma‘an ba‘s olunan Abdullah Efendi b. Mehmed ve Receb Beşe b. Abdullah ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 3 min-Cumâdelâhire sene 1121 Şuhûdü’l-hâl: Hâlâ başyazıcı olan fahrü’l-akrân Ali Efendi b. Zekeriya, Mustafa Yazıcı b. Osman, Halil Efendi b. Bayram, Mehmed Efendi b. Mustafa el-İmâm, Mehmed Efendi b. Yusuf el-Müezzin, Ömer Çelebi b. el-Hâc Mehmed, İbrahim Çelebi b. Mehmed, Abdullah Efendi b. Mehmed ve gayruhum mine’l-huzzâr.