Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 299 Hüküm no: 309 Orijinal metin no: [42a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ali’nin boşandığı kocası Veli Beşe b. Ahmed’de kalan nafaka ve eşya bedeline karşılık üç yüz guruş alarak sulh olduğu Mahmiye-i İstanbul’da Sultan Selim Câmi‘-i şerîfi kurbünde sâkine olup zâtı ta‘rîf-i şer‘î ile mu‘arrefe olan Âişe bt. Ali nâm hatun mahfil-i kazâda zevc-i sâbıkı işbu bâ‘isü’l-kitâb Veli Beşe b. Ahmed nâm kimesne mahzarında ikrâr ve takrîr-i kelâm edip târih-i kitâbdan on beş gün mukaddem mezbûr Veli beni bâyinen tatlîk etmekle zimmetinde mütekarrer ve ma‘kūdün-aleyh olan bin iki yüz akçe mehr-i müeccelimden bana sekiz yüz akçesini def‘ ü teslîm ben dahi yedinden ahz u kabz eyleyip mâ‘adâsı olan dört yüz akçe mehrim ile yevmen fe-yevmen lâzım gelen iddet-i nafakamı ve eşyâ-i memlûkemden iki çârşeb ve dört gömlek taleb ve da‘vâ sadedinde olduğumda beynimizde nizâ‘-ı küllî cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni mezbûr Veli Beşe ile üç yüz akçe üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç yüz akçeyi mezbûr Veli Beşe yedinden tamamen ahz u kabz eyleyip husûs-ı mezbûra ve târih-i kitâba gelince âmme-i da‘vâdan mezbûr Veli Beşe’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 3 min-şehri Cumâdelâhire sene 1121 Şuhûdü’l-hâl: Es-Seyyid Mehmed b. es-Seyyid Osman, Mustafa b. Şa‘ban, Abdullah b. Abdullah, Ali b. İvaz, Ali b. Bâli, Hasan el-Muhzır ve gayruhum mine’l-huzzâr.