Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 299 Hüküm no: 310 Orijinal metin no: [42a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mosko v. Yorgi’nin Rus asıllı cariyesini rızası olmadan sattığı iddiasıyla kayını Canato v. Mirza Reis’e açtığı davadan vazgeçtiği Mahrûse-i Galata nevâhîsinden İstinye nâhiyesine tâbi‘ Yeniköy nâm karyede sâkin Mosko v. Yorgi nâm zimmî meclis-i şer‘-i şerîf-i enverde kayını işbu râfi‘u’s-sifr Canato v. Mirza Reis nâm zimmî muvâcehesinde ikrâr ve takrîr-i kelâm edip târih-i rakīmden beş sene mukaddem ben Eflak diyârında iken evsâfı beynimizde ma‘lûm Rusiyyetü’l-asl Maraşka nâm câriyemi bi-gayr-ı hakkın ahz ve âhara bey‘ ile itlâf etmişidin deyü câriye-i mezbûrenin kıymet-i şer‘iyyesini mezbûr Canato’dan taleb eylediğimde ol dahi câriye-i mezbûreyi emrinle bey‘ ve gāib ani’l-meclis Aslan Reis’e olan yüz guruş deynine edâ eyledim deyü def‘le mukābele ve def‘-i mezkûrunu isbât sadedinde olmağla beynimizde münâza‘ât-ı kesîre ve muhâsamât-ı ekîde vâkı‘a olmuş idi el-hâletü hâzihî ben da‘vâ-yı mezkûremden fâriğ olup husûs-ı mezkûra ve târih-i rakīme gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan ben mezbûr Canato’nun zimmetini ibrâ-i âmm-ı râfi‘u’l-hısâm ile ibrâ ve iskāt edip ol dahi kezâlik târih-i rakīme gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan benim zimmetimi ibrâ ve iskāt eyledi baʻde’l-yevm birbirimiz ile vechen mine’l-vücûh aslâ da‘vâ ve nizâ‘ımız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Mehmed Çelebi b. Receb, Mehmed Çavuş b. Abdullah, Ali b. İvaz el-Muhzır, Mehmed Çelebi b. Ahmed, Mustafa Beşe b. Mehmed, Ebûbekir Çelebi b. Şa‘ban, diğer Mustafa Beşe b. Mehmed, İbrahim Beşe b. Hüseyin, Abdurrahman Çelebi b. el-Hâc Mehmed ve gayruhum mine’l-huzzâr. Sevindi v. Duka, Sava v. Yorgi, Nikola Reis v. Hristodoli, Yorgi v. Dimitri.