Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 300 Hüküm no: 311 Orijinal metin no: [42b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Larance bt. Mirza v. Canato’nun vârislerinden kocası Mosko terekedeki bazı eşyalara ait hissesini kızı Roksana’ya sattığı Mahrûse-i Galata nevâhîsinden İstinye nâhiyesine tâbi‘ Yeniköy nâm karyede sâkine iken bundan akdem hâlike olan Larance bt. Mirza v. Canato nâm Nasrâniyenin verâseti zevci Mosko v. Yorgi ile sadriye kebîre kızı Roksana’ya ve li-ebeveyn er karındaşı Canato’ya münhasıra ve tashîh-i mes’eleleri sekiz sehmden olup sihâm-ı mezbûreden iki sehmi mezbûr Mosko’ya ve dört sehmi kızı mezbûre Roksana’ya ve iki sehmi karındaşı mezbûr Canato’ya isâbet ve intikāl eylediği şer‘an zâhir ve mütehakkık oldukdan sonra zevci mezbûr Mosko mahfil-i kazâda işbu râfi‘atü’s-sifr kızı mezbûre Roksana tarafından husûs-ı âti’z-zikri tasdîka vekîl-i sâbitü’l-vekâlesi olan Yorgi v. Todori nâm zimmî muvâcehesinde ikrâr ve takrîr-i kelâm edip hâlike-i mezbûrenin eşyâ-i memlûkesinden dört döşek ve üç minder ve sekiz yasdık ve dört yorgan ve on sahan ve üç tencere ve bir sini ve üç tâbe ve bir kebîr kazgan ve bir leğen ma‘a ibrik ve üç kebe ve on iki sim düğmeden tashîh-i mezkûr üzere benim hisseme isâbet eden iki sehm-i şâyi‘amı tarafeynden îcâb ve kabûlü hâvî bey‘-i bâtt-ı kat‘î ile kızım müvekkile-i mezbûreye bi-safkatin vâhidetin elli guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr elli guruş mutâlebesinden kızım müvekkile-i mezbûrenin zimmetini ibrâ-i âm ile ibrâ ve iskāt eyledim baʻde’l-yevm eşyâ-i muharrere-i mezbûre kızım müvekkilem merkūmenin mülk-i müşterâsı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Eş-şâhidûnü’s-sâbıkūn, eş-şâhidûnü’s-sâbıkūn, eş-şâhidûnü’s-sâbıkūn