Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 301 Hüküm no: 312 Orijinal metin no: [42b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali Efendi b. Hacı Yusuf’un Gürcü asıllı kölesi Hacı Abdullah b. Yusuf’u azat ettiği Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden irsâl olunan Mevlânâ Ali Efendi b. Sunullah mahmiye-i İstanbul’da Molla Fenârî Mahallesi sükkânından umdetü erbâbi’t-tahrîr ve’l-kalem zübdetü ashâbi’t-tastîr ve’r-rakam el-Hâc Ali Efendi b. el-Hâc Yusuf’un menziline varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i nebevî eyledikde mezkûr Ali Efendi meclis-i ma‘kūd-ı mezkûrda takrîr-i kelâm ve tâʻbir ani’l-merâm edip ben ıtk-ı rakabât a‘zam-ı kurebât ve sebeb-i ref‘-i derecât ve vesîle-i duhûl-i cennât-ı âliyât olduğuna âlim ve câzim olmağla bana rıkkını mu‘terif olan uzun boylu çatık kaşlı elâ gözlü bıyıklı Gürciyyü’l-asl rıkkım el-Hâc Abdullah b. Yusuf nâm abd-i memlûkümü hasbeten lillâhi’l-Meliki’l-Hallâk ve taleben li-merzâti’r-Rabbi’r-rezzâk mâlımdan tahrîr ve i‘tâk ve zümre-i ahrâr-ı asliyyîn silkine idrâc ve ilhâk eyledim baʻde’l-yevm mevsûf-ı mezkûr el-Hâc Abdullah sâir ahrâr-ı asliyyîn gibi hür olup üzerinde velâ-i şer‘îden gayrı hakkım kalmadı dedikde vâki‘ hâli mevlânâ-yı mezkûr mahallinde ketb ü tahrîr edip ba‘dehû ma‘an irsâl olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-hüve’l-vâki‘ bi’t-taleb ketb olundu. Fî 4 min-Cumâdelâhire sene 1121 Şuhûdü’l-hâl: Mehmed Ağa b. Mahmud, Mumcu Ya‘kub Beşe b. Mehmed, el-Hâc Yusuf b. Mahmud, el-Hâc Mustafa b. Mehmed, el-Hâc Eyüb b. Osman, Hasan Halîfe b. Mahmud, Şa‘ban Halîfe b. Mahmud, Ömer Efendi b. Ahmed, Mehmed Efendi b. Abdi ve gayruhum mine’l-huzzâr.