Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 301 Hüküm no: 313 Orijinal metin no: [42b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kasandıra bt. Şirvan’ın Sâliha bt. Süleyman’dan satın aldığı arsanın satışının iptali üzerine Sâliha’ya verdiği arsa bedelini almaktan vazgeçtiği Mahrûse-i Galata muzâfâtından Ortaköy nâm karyede sâkine Kasandıra bt. Şirvan nâm Nasrâniyenin zevci ve tarafından husûs-ı âti’l-beyâna vekîl-i müsecceli olan Dimitraşko v. Kantemer nâm zimmî mahfil-i kazâda zikri âtî menzile vâzı‘atü’l-yed olan Sâliha bt. Süleyman nâm hatunun li-ebeveyn karındaşı ve husûs-ı câi’z-zikri tasdîka vekîli olan el-Hâc Salih Ağa mahzarında ikrâr ve takrîr-i kelâm edip Medîne-i Münevvere Vakfı’ndan olup mahmiye-i İstanbul’da Tevkī‘î Ca‘fer Çelebi Mahallesi’nde vâki‘ bir tarafdan İsa Beşe mülkü ve iki tarafdan tarîk-i âm ile ve bir tarafdan merkūme Kasandıra menzili ile mahdûd Kanlı Kilise kurbünde vâki‘ arsayı mezbûre Sâliha bundan akdem merkūm Şirvan’a iki yüz on guruş bedel mukābelesinde ferağ ettiğinden sonra mezbûre Sâliha izn-i mütevellî bulunmamağla ferağ mu‘teber değildir deyü arsa-yı mezbûreyi mezbûre Kasandıra’dan geri ahz u kabz ettiğinden sonra merkūme Kasandıra tarafından ben bi’l-vekâle bedel-i ferağ olmak üzere verdiğimiz meblağ-ı mezbûr iki yüz on guruşu mezbûre Sâliha’dan da‘vâ ve taleb ettiğimizde ol dahi menzil-i mezkûrun fevkānî bir oda ve tahtında bir matbah ve bir odasını merkūme Kasandıra hedm ve istihlâk edip arsa-yı sırfa kaldı deyü da‘vâ etmekle beynimizde nizâ‘-ı küllî vâki‘ olmuş idi el-hâletü hâzihî merkūme Kasandıra menzil-i mezkûra ve bedel-i ferağ olan meblağ-ı mezbûr iki yüz on guruşa müte‘allika da‘vâdan mezbûre Sâliha’nın zimmetini ibrâ-i âm ile ibrâ ve iskāt eyledi baʻde’l-yevm menzil-i mezkûrun arsası mezbûre Sâliha’nın tasarrufunda olup merkūme Kasandıra’nın alâkası kalmamışdır keyfe mâ teşâ mutasarrıfe olsun dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Hüseyin b. Abdullah, Osman b. Hasan, İbrahim b. el-Hâc Salih, Mehmed b. Ahmed, Mehmed b. Hasan, el-Hâc Mustafa b. Ali, Hasan b. Abdullah ve gayruhum mine’l-huzzâr.