Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 302 Hüküm no: 314 Orijinal metin no: [42b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hidayetullah Ağa b. Hacı Osman’ın, Ali Ağa b. Murad’da kalan atını geri alarak zimmetini ibra ettiği Vilâyet-i Anadolu’da Milan kazâsında Kükürd nâm karye sükkânından olup mahmiye-i İstanbul’da Çukurbostan Mahallesi’nde müsâferet vechi üzere sâkin Hidayetullah Ağa b. el-Hâc Osman nâm kimesne meclis-i şer‘-i şerîf-i enverde sâbıkā Adana vâlîsi olan Can Arslanzâde Hüseyin Paşa’nın kapıcılar kethüdâsı olan işbu râfi‘u’l-kitâb Ali Ağa b. Murad nâm kimesne mahzarında ikrâr ve takrîr-i kelâm edip mezbûr Ali Ağa bundan akdem yedimde mülküm olan bir re’s kır iğdic bârgir ve bir re’s doru atımı bir husûs için bi-gayr-ı hakkın ahz u kabz etmekle zikr olunan bârgir ve atı mezbûr Ali Ağa’dan [43a] bundan esbak taleb ve da‘vâ etmişidim lâkin zikri mürûr eden atın aynı mevcûd olmağla zikr olunan atı mezbûr Ali Ağa bana def‘ ü teslîm ben dahi yedinden baʻde’l-ahz merkūm Ali Ağa bârgir da‘vâsından benimle on guruş üzerine sulh olduğunda ben dahi ber-vech-i muharrer sulh-ı mezbûru baʻde’l-kabûl bedel-i sulh olan meblağ-ı mezbûr on guruşu merkūm Ali Ağa bana def‘ ü teslîm ben dahi yedinden ahz u kabz eylediğimden sonra husûs-ı mezbûra müte‘allika olan âmme-i da‘vâdan merkūm Ali Ağa ve mûmâ-ileyh Hüseyin Paşa’nın zimmetlerini ibrâ ve iskāt eyledim dedikde gıbbe’t-tasdîkı’l-mer‘î mâ-hüve’l-vâki‘ bi’t-taleb ketb olundu. Fi’l-yevmi’l-hâmis min-Cumâdelâhire sene 1121 Şuhûdü’l-hâl: el-Hâc Mustafa b. Hüseyin, Halil Ağa b. el-Hâc Ali, Ali Ağa b. Osman Efendi, Ali Bey b. Resul, Alaybeyi Ali Ağa b. Muslu Ağa, Fahrü’l-kuzât Hasan Efendi Kethüdâ-yı Dâmadzâde, Osman Ağa b. Ali ve gayruhum mine’l-huzzâr.