Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 303 Hüküm no: 315 Orijinal metin no: [43a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Hüseyin’in geçinemediği kocası Mehmed Çelebi b. Abdurrahman’dan boşanıp birbirlerinin zimmetlerini ibra ettikleri Mahmiye-i İstanbul’da Edirnekapısı kurbünde vâki‘ el-Hâc Muhyiddin Mahallesi sâkinelerinden olup zâtı Şa‘ban Efendi b. Ebûbekir ve Mahmud Odabaşı b. Mustafa ta‘rîfleriyle mu‘arrefe olan Fâtıma bt. Hüseyin nâm hatun meclis-i şer‘-i şerîf-i enverde zevc-i dâhili işbu râfi‘u’l-kitâb Mehmed Çelebi b. Abdurrahman nâm kimesne mahzarında ikrâr ve takrîr-i kelâm edip mezbûr Mehmed Çelebi zevcim olup beynimizde hüsn-i zindegānemiz olmamağla zimmetinde mütekarrer ve ma‘kūdün-aleyh olan dört bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi kendi üzerime olmak üzere zevcim mezbûr Mehmed Çelebi ile muhâla‘a-i sahîha-i şer‘iyye ile hul‘ olduğumda ol dahi vech-i meşrûh üzere hul‘-ı mezbûru kabûl eylediğinden sonra hukūk-ı zevciyete ve beynimizde ilm-i şer‘î ile ma‘lûm menzil da‘vâsından zevcim mezbûr Mehmed Çelebi’nin zimmetini ibrâ-i âmm-ı râfi‘u’l-hısâm ile ibrâ ve iskāt edip ve merkūm Mehmed Çelebi dahi kezâlik husûs-ı mezkûra müte‘allika olan âmme-i da‘vâdan benim zimmetimi ibrâ ve iskāt eyledi dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 7 min-Cumâdelâhire sene 1121 Şuhûdü’l-hâl: Süleyman Efendi b. Ebûbekir, Mahmud Odabaşı b. Mustafa, Mumcu Ahmed Beşe b. Abdullah, İsmail Çelebi b. Ahmed, Ali Çelebi b. İvaz, Mustafa Çelebi b. Şa‘ban, Abdullah b. Abdullah, Ali Çelebi b. Bâli ve gayruhum mine’l-huzzâr.