Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 303 Hüküm no: 316 Orijinal metin no: [43a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gönye’nin Oluklarbaşı Mahallesi’nden Ayşe Hatun bt. Molla Ali b. Ebûbekir’in geçinemediği kocası Ali Beşe b. Hüseyin’den boşandığı Vilâyet-i Anadolu’da Gönye kasabasında Oluklarbaşı Mahallesi sâkinelerinden Âişe Hatun bt. Monla Ali b. Ebûbekir tarafından husûs-ı âti’z-zikre vekîl olduğu kasaba-i mezbûrede Oluklarbaşı Mahallesi’nden Ali Beşe b. Hüseyin ve Kireçhâne Mahallesi’nden Hasan Beşe b. İslam nâm kimesneler şehâdetleriyle şer‘an sâbit olan diğer Ali Beşe b. Mustafa nâm kimesne meclis-i şer‘-i şerîf-i enverde müvekkile-i mezbûrenin zevc-i dâhili işbu hâmilü’l-kitâb Ali Beşe b. Hüseyin nâm kimesne mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun’un zevci mezbûr Ali Beşe ile beynlerinde hüsn-i mu‘âşeretleri olmamağla müvekkilem mezbûre Âişe Hatun’un mezbûr Ali Beşe zimmetinde olan on bin akçe mehr-i müecceli ve nafaka-i iddet-i ma‘lûmesi üzerlerine ve meûnet-i süknâsı dahi kendi üzerine ve yetmiş guruş bâ-hüccet-i şer‘iyye hükmolunan nafaka-i mefrûza-i müstedânesi dahi bedel-i hul‘ olmak üzere bi’l-vekâle mezbûr Ali Beşe ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete ve târih-i kitâba gelince beynlerinde cereyân eden hukūk-ı ma‘lûme ve mechûleye müte‘allika cemî‘ de‘âvî ve mutâlebâtdan ben bi’l-vekâle mezbûr Ali Beşe’nin zimmetini ibrâ ve iskāt eyledim ol dahi kezâlik hukūk-ı zevciyete ve târih-i kitâba gelince beynlerinde cereyân eden hukūk-ı ma‘lûme ve mechûleye müte‘allika âmme-i da‘vâdan müvekkilem mezbûre Âişe’nin zimmetini ibrâ ve iskāt eyledi fîmâ-ba‘d birbiri ile kat‘â da‘vâ ve nizâ‘ları kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 6 min-Cumâdelâhire sene 1121 Şuhûdü’l-hâl: Mehmed Ağa b. Abdullah Kethüdâ-yı muhzırân, Ali Çelebi b. İvaz, Abdullah b. Abdullah, Mustafa Çelebi b. Şa‘ban, Hasan b. Abdullah, Süleyman b. Abdullah ve gayruhum mine’l-huzzâr.