Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 304 Hüküm no: 317 Orijinal metin no: [43a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Ömer’in vefât eden kocası Bizeban Osman’ın Hasan Çelebi b. İslam’da kalan alacağını tahsil ettiği Mahmiye-i İstanbul’da Kabasakal Mahallesi’nde sâkine Âişe bt. Ömer nâm hatun ba‘de’t-ta‘rîf mahfil-i kazâda işbu râfi‘u’l-kitâb Hasan Çelebi b. İslâm nâm kimesne mahzarında ikrâr ve takrîr-i kelâm edip merhûm Rüstempaşa Vakfı’ndan olup mahalle-i mezbûrede vâki‘ bir tarafdan Mustafa Ağa menzili ve bir tarafdan Kuşçubaşı menzili ve bir tarafdan Pehlivan Mustafa Bey menzili ve bir tarafdan tarîk-i hâs ile mahdûd menzilin rub‘unu mukaddemâ mutasarrıf olan mezbûr Hasan Çelebi sâbıkā zevcim olup bundan akdem vefât eden Bî-zebân Osman nâm kimesneye yüz iki buçuk guruş bedel mukābelesinde bâ-izn-i mütevellî ferağ ve tefvîz ol dahi ba‘de’t-tefevvüz bedel-i ferağ olan meblağ-ı mezbûru mezbûr Hasan Çelebi ahz u kabz ettiğinden sonra zevcim mezbûr Bî-zebân Osman kable’l-istîfâ fevt olmağla istîfâ olunmayan meblağ-ı mezbûr bedel-i ferağdan benim rub‘ hisseme isâbet eden yirmi yedi buçuk guruşu mezbûr Hasan Çelebi’den ahz u kabz edip bedel-i mezbûra ve bi’l-cümle menzil-i mezkûra müte‘allika âmme-i da‘vâdan mezbûr Hasan Çelebi’nin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm husûs-ı mezkûra müte‘allika vechen mine’l-vücûh da‘vâ ve nizâ‘ım kalmadı dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî-evâhiri Rebîʻülâhir sene 1121 Şuhûdü’l-hâl: Hüseyin Efendi b. Ali el-İmâm, Tırnakçı Hasan Ağa, Karakaş Mehmed Çelebi, el-Hâc Mustafa el-Kayyum, Ömer Bey b. Çavuş Hacı Ömer, el-Hâc Mustafa Efendi tâbi‘-i efendi ve gayruhum mine’l-huzzâr.