Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 305 Hüküm no: 318 Orijinal metin no: [43b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah bt. Mehmed’in köle olmadığını ispat etmesiyle serbest bırakıldığı Zikri âtî da‘vâya kıbel-i şer‘den me’zûn olan orta boylu açık kaşlı sarı elâ gözlü Emetullah bt. Mehmed nâm hatun meclis-i şer‘-i şerîf-i enverde kendüye rakīka olmak üzere vaz‘-ı yed eden Ahmed Beşe b. Mustafa nâm kimesne mahzarında üzerine da‘vâ ve takrîr-i kelâm edip ben mahrûse-i Galata muzâfâtından kasaba-i Kasım Paşa’da Küçük Piyale Paşa Mahallesi’nden hürrü’l-asl Mehmed b. Mustafa nâm kimesnenin firâşından hâsıla ve zevcesi olup hürretü’l-asl olan Fâtıma bt. Abdullah nâm hatundan mütevellide hürretü’l-asl iken mezbûr Ahmed Beşe bana rakīka olmak üzere bi-gayr-ı hakkın vaz‘-ı yed eder suâl olunup kasr-ı yedine tenbîh ve sebîlim tahliye olunmak matlûbumdur dedikde gıbbe’s-suâl mezbûr Ahmed Beşe cevâbında mevsûfe-i mezbûreyi işbu hâzırân bi’l-meclis Mustafa b. Mehmed ve İbrahim b. Ali nâm kimesnelerden bundan akdem iki yüz otuz guruş semen-i medfû‘a iştirâ edip mülk-i müşterâm olmak üzere vaz‘-ı yed ederim deyü vaz‘-ı yedini ikrâr lâkin ber-vech-i muharrer hürriyetini inkâr edicek müdde‘iye-i mevsûfe-i mezbûreden müdde‘âsını mübeyyine beyyine taleb olundukda udûl-i ahrâr-ı ricâl-i Müslimînden ve mârru’z--zikr Küçük Piyale Paşa Mahallesi’nden Abdurrahman b. Mehmed ve Ahmed b. Mehmed nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ işbu müdde‘iye-i mevsûfe-i mezbûre mahalle-i mezbûrede sâkin hürrü’l-asl olan Mehmed b. Mustafa nâm kimesnenin firâşından hâsıla ve zevcesi olup hürretü’l-asl olan Fâtıma bt. Abdullah nâm hatundan mütevellide hürretü’l-asl olup kendiye ve ebeveynine rık târî olmamışdır biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince mevsûfe-i mezbûre Emetullah Hatun’dan merkūm Ahmed Beşe’nin kasr-ı yedine hükmolunup sebîli tahliye olunmağın mâ-vaka‘a bi’t-taleb ketb olundu. Fî 7 min-Cumâdelâhire sene 1121 Şuhûdü’l-hâl: Hasan Beşe b. Osman, Osman Çelebi b. Hasan, Hasan Çelebi b. Mustafa, Süleyman Çelebi b. Abdullah, Ali b. Abdullah, Mustafa Çelebi b. Şa‘ban, Ali Çelebi b. İvaz, Abdullah Çelebi b. Mustafa, Abdullah Çelebi b. Abdullah ve gayruhum mine’l-huzzâr.