Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 306 Hüküm no: 319 Orijinal metin no: [43b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Hasan’ın Hoca Üveys Mahallesi’ndeki evini istiğlal yoluyla Velizâde Efendi Vakfı’na satıp tekrar bir seneliğine kiraladığı Mahmiye-i İstanbul’da Hoca Üveys Mahallesi’nde sâkin Mustafa Çelebi b. Hasan nâm kimesne meclis-i şer‘-i şerîf-i enverde merhûm Velizâde Efendi Vakfı’na bi’l-fi‘il mütevellî olan Kasım Ağa imâmı işbu râfi‘u’r-rakīm Abdullah Efendi b. Halil Efendi mahzarında ikrâr ve takrîr-i kelâm edip yedimde mülküm olup mahalle-i mezbûrede vâki‘ bir tarafdan baʻzan Derzi Mehmed Çelebi menzili ve baʻzan merhûm Doğramacı Mehmed Paşa menzili ve bir tarafdan yine merhûm-ı müşârun-ileyh menzili ve bir tarafdan karındaşım Süleyman Çelebi menzili ve bir tarafdan tarîk-i âm ile mahdûd mülk menzilimi cümle tevâbi‘ ve levâhıkı ile mütevellî-i mezbûr Abdullah Efendi’ye iki yüz yetmiş guruşa bi-tarîkı’l-istiğlâl bey‘ ve teslîm ol dahi ber-vech-i muharrer iştirâ ve tesellüm edip semeni olan meblağ-ı mezbûr iki yüz yetmiş guruşu yedinden tamamen ahz u kabz eylediğimden sonra mütevellî-i mezbûr menzil-i mahdûd-ı mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin kırk buçuk guruşa bana îcâr ve teslîm ben dahi vech-i meşrûh üzere istîcâr ve tesellüm ve kabûl eyledim dedikde gıbbe’t-tasdîkı’l-mer‘î mezbûr Mustafa Çelebi’nin oğlu işbu hâzır bi’l-meclis Ahmed Çelebi meclis-i şer‘de mütevellî-i mezbûr muvâcehesinde takrîr-i kelâm edip meblağ-ı merkūm ile ücret-i mezbûre cem‘an üç yüz on buçuk guruşa kefâlet-i sahîha-i şer‘iyye ile ben kefîl ve dâmin oldum dedikde yine mezbûr Mustafa Çelebi i‘âde-i kelâm edip meblağ-ı mezbûr iki yüz yetmiş guruş ile ücret-i merkūme kırk buçuk guruşa ber-vech-i muharrer sene tamamında mütevellî-i merkūma edâ ve teslîm eylemez isem menzil-i mezkûru sûk-ı sultânîde baʻde’l-müzâyede semen-i misli ile âhara bey‘ ve kabz-ı semene ve semen-i mezkûrdan meblağ-ı mezbûr iki yüz yetmiş guruş ile ücret-i mezbûru mütevellî-i mezbûra edâ ve fazla kalır ise bana îsâle ve bunların mütevakkıf olduğu umûrun küllîsine azl ve in‘izâlden masûne vekâlet-i devriye ile işbu Abdurrahman Çelebi b. Ali’yi tarafımdan vekîl ve nâib-i menâb nasb u ta‘yîn eyledim dedikde ol dahi vekâlet-i mezbûreyi kabûl ve hizmet-i lâzımesin edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 7 min-Cumâdelâhire sene 1121 Şuhûdü’l-hâl: Ebûbekir Efendi b. İbrahim, Yahya Efendi b. Mustafa, Mustafa Odabaşı b. Yahya, Ali Çelebi b. Ahmed, Molla Mustafa Câbî-i vakf-ı mezbûr, Mehmed Beşe b. Nasuh, Ali Çelebi b. İvaz, Hasan b. Abdullah, Mustafa Çelebi b. Şa‘ban ve gayruhum mine’l-huzzâr.