Üsküdar Mahkemesi 5 Numaralı Sicil (H.930-936 / M. 1524-1530) cilt: 3, sayfa: 333 Hüküm no: 619 Orijinal metin no: [101b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Selman Ağa Vakfı’ndan Alagöz b. Abdullah’a ödünç verilmesi 1.000 Sebeb-i tahrîr-i sicil budur ki Merkūm zâviye mütevellîsi Süheyl b. Abdullah meclis-i şer‘de Alagöz b. Abdullah mahzarında takrîr-i merâm kılıp eyitti ki, mezbûr zâviyeye vakf olan meblağdan bin akçe karz-ı hasen ve yüz akçe kaftan bahâsından cem‘an bin yüz akçe olur işbu târihu’l-kitâbdan sene-i kâmile tamâm olunca edâ etmek üzere verdim, dedikde mezkûr Alagöz mastûr mütevellîyi cemî‘ mâ-akarra bihîsinde tasdîk eyledikten sonra meblağ-ı mezbûrun zararına Dellâk Mustafa kefîl bi’l-mâl olup ve mezbûr Zâviye mahallesinde el-ân içinde sâkin olduğum evim rehnim olsun dediği sebt-i sicil olundu. Tahrîren fî evâili Muharremi’l-harâm. Şuhûdü’l-hâl: Kara Hüseyin b. Sinan, Turahan b. Süleyman, Şaban Halife el-imâm, Mehmed b. Süleyman, Mustafa b. Bahadır.