Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 307 Hüküm no: 320 Orijinal metin no: [43b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa b. Mehmed ile hanımı Ayşe bt. Hüseyin’in küçük çocukları Abdülvehhab’a sarkıntılık yaptığı ve Ayşe’yi dövüp çocuğunu düşürdüğü iddiasıyla Mehmed Efendi b. Abdullah’a açtıkları davadan feragat edip Mehmed Efendi de onlardan alacak davasından vazgeçtiği Mahmiye-i İstanbul’da Uzun Yusuf Mahallesi sükkânından Abdülvehhab nâm sagīrin babası ve velîsi Mustafa b. Mehmed nâm kimesne velâyeten ve zevcesi Âişe bt. Hüseyin nâm hatun tarafından vekîl olduğu zât-ı mezkûreyi ma‘rifet-i şer‘iyye ile ârifân Abdullah Çelebi b. Yusuf ve Mustafa Çelebi b. Ali şehâdetleriyle şer‘an sâbit olmağla vekâleten mezkûr Mustafa meclis-i şer‘-i şerîf-i enverde yine mahmiye-i mezkûrede Ca‘fer Ağa Mahallesi sükkânından Mehmed Efendi b. Abdullah tarafından husûs-ı âti’l-beyâna vekîl olduğu Mustafa Çelebi b. Ali ve Yahya Çelebi b. Mehmed şehâdetleriyle şer‘an sâbit olan Mehmed Çelebi b. İbrahim nâm kimesne muvâcehesinde ikrâr ve takrîr-i kelâm edip oğlum sagīr-i mezkûr ile üstâdı işbu hâzır bi’l-meclis Abdullah b. Yusuf müvekkil-i mezkûr Mehmed Efendi’nin menzili önünden gider iken müvekkil-i mezkûr Mehmed Efendi fi‘l-i şenî‘a kasdıyla oğlum mezkûru kendi menziline alıp ba‘dehû oğlum mezkûr râzı olmadığından mâ‘adâ müvekkilem mezkûre Âişe’yi darbedip müstebînü’l-hilka cenîn ilkā etmekle müvekkil-i mezkûrdan mûceb-i şer‘îsini da‘vâ eylediğimizde müvekkil-i mezkûr Mehmed Efendi oğlum mezkûr ile üstâdı mezbûr Abdullah’dan benim bi-gayr-ı hak on beş altınım ile on guruş kıymetli bir kuşak ve yirmi miskāl altından masnû‘ bir çift bileziğimi hufyeten ahz u kabz eylediniz deyü da‘vâ etmeğin beynimizde nizâ‘-ı küllî vukū‘undan sonra muslihûn tavassut edip da‘vâ-yı mezkûremizden bizi sulh ve biz dahi sulh-ı mezbûru kabûl ve husûs-ı mezkûra ve gayra müte‘allika âmme-i da‘vâdan biz mezkûr Mehmed Efendi’nin zimmetini ibrâ ve iskāt edip ol dahi on beş altın ve kuşak ve bilezik ve sâir da‘vâdan bizim ve mezkûr Abdullah’ın zimmetini ibrâ-i âmm-ı râfi‘u’l-hısâm ile ibrâ ve iskāt eyledi dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-Cumâdelâhire sene 1121 Şuhûdü’l-hâl: Mustafa Efendi b. İsmail, Mehmed Çavuş b. Mehmed, Yahya Çelebi b. Mehmed, Mustafa Çelebi b. Ali ve gayruhum mine’l-huzzâr.