Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 308 Hüküm no: 321 Orijinal metin no: [44a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mekke Kadılığı yapmış olan Cevvîzâde Atâullah Efendi’nin vefât eden Hamavî Seyyid Mehmed Çelebi b. Seyyid Hüseyin b. Ali’den satın aldığı evin satışı caiz olmadığından evi vârislere iade etmesi Husûs-ı âti’l-beyânın mahallinde istimâ‘ ve fasl u hasmı için bi’l-iltimâs bu fakīr Dârü’l-hilâfeti’l-aliyye Kostantıniyyeti’l-mahmiye’de Haraccı Muhyiddin Mahallesi ahâlîsinden olup muvakkaten Mekke-i mükerreme kādısı olan a‘lemü’l-ulemâi’l-mütebahhirîn efdâlü’l-fuzalâi’l-müteverri‘în fazîletli Civizâde Atâullah Efendi hazretlerinin sa‘âdethânelerine varıp zeyl-i kitâbda muharrerü’l-esâmî Müslimîn huzûrlarında akd-i meclis-i şer‘-i şerîf olundukda mahmiye-i mezbûrede el-Hâc Hamza Mahallesi sükkânından iken bundan akdem vefât eden Hamavî es-Seyyid Mehmed Çelebi b. es-Seyyid Hüseyin b. Ali’nin sulbî sagīr oğulları es-Seyyid Hüseyin b. Ali’nin sulbî sagīr oğulları es-Seyyid Hüseyin ve es-Seyyid Abdülkâfî’nin tesviye-i emrlerine vasiyy-i muhtârları olan el-Hâc İbrahim b. Muslu meclis-i ma‘kūd-ı mezbûrda sâhibü hâze’l-kitâb mûmâ-ileyh Atâullah Efendi hazretleri mahzarında bi’l-vesâye üzerine da‘vâ ve takrîr-i kelâm edip müteveffâ-i mezbûr Hamavî es-Seyyid Mehmed hâl-i hayâtında yedinde mülk ve hakkı olup medîne-i Üsküdar’da Reis Mahallesi’nde vâki‘ bir tarafdan yine zikr olunan Reis Vakfı’ndan odalar ve bir tarafdan Baltacılar Kethüdâsı eytâmı bostanı ve iki tarafdan tarîk-i âm ile mahdûd hâriciyede fevkānî üç bâb oda ve iki sofa ve dehlîz ve tahtânî üç bâb oda ve bir ahır ve anbar ve kapı ve dâhiliyede fevkānî dört bâb oda ve bir kenîf ve bir bâb tahtânî oda ve bir hamam ve bir matbah ve başka kapılı altlı ve üstlü beş bâb oda ve bir köşk ve yanında bir oda ve cüneyne ve bahçeyi müştemil menzilini bin yüz on altı senesi Cumâdelûlâ’sının yirmi yedinci günü mûmâ-ileyh Atâullah Efendi hazretlerine bey‘-i bât ile üç bin guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eyledikden sonra semeni olan meblağ-ı mezbûr üç bin guruşu kable’l-ahz mezbûr Hamavî es-Seyyid Mehmed Çelebi vefât edip meblağ-ı mezbûr oğulları sagīrân-ı mezbûrâna isâbet ve intikāl etmekle hâlâ meblağ-ı mezbûru sagīrân-ı mezbûrân için bi’l-vesâye taleb ederim suâl olunsun dedikde gıbbe’s-suâl mûmâ-ileyh Atâullah Efendi cevâbında fi’l-vâki‘ târih-i mezbûrda menzil-i mahdûd-ı mezbûru müteveffâ-i mezbûr Hamavî es-Seyyid Mehmed’den hâl-i hayâtında üç bin guruşa iştirâ ve kabz eylediğini ikrâr lâkin semeni olan meblağ-ı mezbûru her ne vakit mansıb olur isem mansıbda edâ etmek üzere ecel-i mechûl ile iştirâ edip ona binâen bey‘-i mezbûr sahîh olmayıp ve menzil-i mezbûr hâlâ taht-ı yedimde olmağla menzil-i mezbûru akd-i mezbûrun adem-i sıhhatine binâen geri ahz ve sagīrân-ı mezbûrân için zabt eylesin deyü def‘le mukābele ve hâlâ revnak-efzâ-yı sadr-ı fetvâ şeyhü meşâyihü’l-islâm müfti’l-enâm hazretlerinin Zeyd mülk menzilini Amr-ı kādıya şu kadar akçeye bey‘ eder oldukda meblağ-ı mezbûru her ne vakit mansıb olursa mansıbda edâ etmek üzere ecel-i mechûl ile bey‘ eylese bey‘-i mezbûr sahîh olurmu deyü istiftâ olundukda olmaz deyü iftâ buyurduklarını nâtıka bir kıt‘a fetvâ-yı şerîfe ibrâz etmeğin gıbbe’l-istintak ve’l-inkâr mûmâ-ileyh Atâullah Efendi’den takrîr-i meşrûhuna mutâbıka beyyine taleb olundukda udûl-i ahrâr-ı ricâl-i Müslimînden ve medîne-i mezbûrede Debbâğlar Mahallesi sükkânından İbrahim Efendi b. Ya‘kub ve Câmi‘-i Kebîr Mahallesi sükkânından Mustafa Efendi b. İbrahim ve el-Hâc Mehmed b. İvaz nâm kimesneler li-ecli’ş-şehâde meclis-i ma‘kūd-ı mezbûra hâzirûn olup isre’l-istişhâd fi’l-vâki‘ müteveffâ-i mezbûr Hamavî es-Seyyid Mehmed b. es-Seyyid Hüseyin b. Ali hayâtında bin yüz on altı senesi Cumâdelûlâ’sının yirmi yedinci günü medîne-i Üsküdar’da Reis Mahallesi’nde vâki‘ bir tarafdan Reis Vakfı olan odalar ve bir tarafdan Baltacılar Kethüdâsı eytâmı bostanı ve iki tarafdan tarîk-i âm ile mahdûd dâhiliye ve hâriciyede büyût-ı adîde ve bahçe ve hamamı müştemil menzilini mûmâ-ileyh Atâullah Efendi’ye her ne vakit mansıb olursa mansıbda edâ etmek üzere üç bin guruşa ecel-i mechûl ile bey‘ ve teslîm ol dahi ber-vech-i muharrer iştirâ ve tesellüm etmişidi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebiyle baʻde’l-hükm ve’t-tenbîh mâ-vaka‘a bi’t-taleb ketb olundu. Fî 3 min-Cumâdelâhire sene 1121 Şuhûdü’l-hâl: Es-Seyyid Osman Çelebi b. es-Seyyid Abdurrahman, Hasan Çelebi b. Mehmed, Ahmed Efendi Ünsîzâde, Mehmed Çelebi Bâlizâde, Çukadâr Mustafa Çelebi, Camcı Ahmed, Ahmed Çelebi b. Mehmed ve gayruhum mine’l-huzzâr