Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 310 Hüküm no: 323 Orijinal metin no: [44a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Celeb Abdi Beşe b. Hacı Mehmed ve ortağı Ustoyan v. Niko’nun firarî İbrahim’deki alacaklarını kayın pederi Ebûbekir Ağa b. Süleyman’dan talep etmişlerse de kefalet süresi dolduğundan davanın reddedildiği Celeb tâifesinden Abdi Beşe b. el-Hâc Mehmed ve şerîki Ustoyan v. Niko nâm zimmî mahfil-i kazâda işbu râfi‘u’l-kitâb Ebûbekir Ağa b. Süleyman nâm kimesne mahzarında her biri üzerine da‘vâ ve takrîr-i kelâm edip mezbûr Ebûbekir Ağa’nın dâmadı gāib ani’l-meclis İbrahim nâm kimesne zimmetinde adedi beynimizde ma‘lûm koyun bahâsından ba‘de külli’l-hesâb yüz on iki guruş hakkımız olmağla meblağ-ı mezbûra emr ve kabûlü hâviye kefâlet-i sahîha-i şer‘iyye ile mezbûr Ebûbekir kefîl olmuş idi hâlâ kefâlet-i mahkiyyesine binâen [44b] suâl olunup meblağ-ı mezbûrun alıverilmesi matlûbumuzdur dediklerinde gıbbe’s-suâl mezbûr Ebûbekir Ağa cevâbında hâl minvâl-i muharrer üzere olup lâkin ben şehr-i Rebî‘ülevvel’in yirminci gününden elli gün tamamına değin muvakkaten kefîl olup vakt-i mezbûr mürûr etmekle zimmetim kefâletden berî olmuşdur deyü def‘le mukābele edicek gıbbe’l-istintak mezbûrân Abdi Beşe ve şerîki Ustoyan cevâblarında ber-minvâl-i muharrer muvakkaten kefîl olup vakt-i mezbûr mürûr eylediğini her biri ikrâr u i‘tirâf etmeğin alâ-mûcebi i‘tirâfihimâ müdde‘iyân-ı mezbûrân bî-vech mu‘âraza ve müdâhaleden men‘-birle mâ-vaka‘a bi’t-taleb ketb olundu. Fî 28 Cumâdelûlâ sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Ali Çelebi b. Bâli, Hasan b. Abdullah, Süleyman b. Abdullah, Abdullah b. Abdullah, Ali b. Abdullah, Hasan b. Abdullah ve gayruhum mine’l-huzzâr.