Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 311 Hüküm no: 324 Orijinal metin no: [44b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Nişancı Paşa-yı Cedid Camii Vakfı câbîsi Mehmed Çelebi b. Ebûbekir’in önceki câbi Mustafa b. Mehmed’den satın aldığı vazifeleri tekrar iade ederek parasını tahsil ettiği Mahmiye-i İstanbul’da Yenikapı kurbünde Karabaş Mahallesi sükkânından olup merhûm Nişancı Paşa-yı Cedîd Câmi‘-i şerîfi Vakfı’nın hâlâ câbîsi olan Mehmed Çelebi b. Ebûbekir nâm kimesne meclis-i şer‘-i şerîfde sâbıkā vakf-ı mezbûr câbîsi olan işbu sâhibü’l-kitâb Mustafa b. Mehmed nâm kimesne mahzarında ikrâr-ı tâm ve takrîr-i kelâm edip bundan akdem mezbûr Mustafa vakf-ı mezbûrda mutasarrıf olduğu yevmî on akçe cibâyet ve beş akçe kitâbet ve beş akçe devriyedârlık ki cem‘an yirmi akçe cihetlerini dört yüz guruş bedel-i makbûz mukābelesinde bana ferağ ve kasr-ı yed etmişidi hâlâ cihât-ı mezkûreyi ben dahi hüsn-i rızâm ile yine câbî-i mezbûr Mustafa’ya ferağ ve kasr-ı yed edip bedel nâmıyla medfû‘um olan meblağ-ı mezbûr dört yüz guruşu mezbûr Mustafa bana def‘ ü teslîm ben dahi yedinden tamamen ahz u kabz eylediğimden sonra cihât-ı mezkûrenin yedimde olan berâtların ve tezkirelerin mezbûr Mustafa’ya def‘ ü teslîm ol dahi ahz u kabz edip cihât-ı mezbûreye ve bedel-i merkūm dört yüz guruşa müte‘allika cemî‘ de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt-ı tamm-ı râfi‘u’l-hısâm ile iskāt eyledik fîmâ-ba‘d husûs-ı mezbûra müte‘allik birbirimiz ile vechen mine’l-vücûh kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 28 min-Cumâdelûlâ sene 1121 Şuhûdü’l-hâl: Abdülbâki Çavuş b. Ârif Mehmed, Çukadâr Yusuf Çavuş [b.] Abdullah el-Mübâşir, Mehmed Ağa b. Abdullah Kethüdâ-yı muhzırân, Mehmed Çelebi b. Abdullah, Mustafa Efendi tâbi‘-i hazret-i efendi, Hüseyin Çelebi b. Abdurrahman, Ali Çelebi b. İvaz, Ahmed Çelebi b. Abdullah, Mehmed Çelebi b. Yusuf ve gayruhum mine’l-huzzâr.