Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 312 Hüküm no: 326 Orijinal metin no: [44b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Larance bt. Mirza’nın vârislerinden kardeşi Canato’nun terekedeki bazı eşyalara ait hissesini Larance’nin kızı Roksana’ya sattığı Mahrûse-i Galata nevâhîsinden İstinye nâhiyesine tâbi‘ Yeniköy nâm karyede sâkine iken bundan akdem hâlike olan Larance bt. Mirza v. Canato nâm Nasrâniyenin verâseti zevc-i metrûku Mosko v. Yorgi ile sadriye kebîre kızı Roksana’ya ve li-ebeveyn er karındaşı Canato’ya münhasıra ve tashîh-i mes’eleleri dört sehmden olup sihâm-ı mezbûreden bir sehmi zevci mezbûra ve iki sehmi kızı mezbûre Roksana’ya ve bir sehmi karındaşı mezbûr Canato’ya isâbet ve intikāl eylediği şer‘an zâhir ve mütehakkık oldukdan sonra mezbûr Canato zimmî mahfil-i kazâda işbu bâ‘isetü’s-sifr mezbûre Roksana tarafından husûs-ı âti’z-zikri tasdîka vekîl-i sâbitü’l-vekâlesi olan Yorgi v. Todori nâm zimmî muvâcehesinde ikrâr ve takrîr-i kelâm edip hâlike-i mezbûrenin emlâkinden olup karye-i mezbûrede vâki‘ bir tarafdan Vasil zimmî mülkü ve bir tarafdan Manol zimmî mülkü ve iki tarafdan tarîk-i âm ile mahdûd fevkānî üç bâb oda ve bir mahzen ve bir kenîf ve müşterek bi’r-i mâ ve bir mikdâr bahçeyi müştemil mülk menzil ile dört döşek ve üç minder ve sekiz yasdık ve dört yorgan ve on sahan ve üç tencere ve bir sini ve üç tâbe ve bir kebîr kazgan ve bir leğen ma‘a ibrik ve üç kebe ve on iki sim düğmeden tashîh-i mezkûr üzere benim hisseme isâbet eden bir sehm hisse-i şâyi‘amı tarafeynden îcâb ve kabûlü hâvî <<şürût-ı müfsideden ârî>> bey‘-i bâtt-ı sahîh-i şer‘î ile müvekkile-i mezbûreye bi-safkatin vâhidetin yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr yüz guruş mutâlebesinden müvekkile-i mezbûre Roksana’nın zimmetini ibrâ-i âm ile ibrâ ve iskāt eyledim baʻde’l-yevm menzil-i mezkûr ile eşyâ-i muharrere-i mezbûrede olan bir sehm hisse-i şâyi‘am müvekkile-i mezbûrenin mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Mehmed Çelebi b. Receb, Mehmed Çavuş b. Abdullah el-Mübâşir, Ali Çelebi b. İvaz el-Muhzır, Mehmed Çelebi b. Ahmed, Ebûbekir Çelebi b. Süleyman, Ebûbekir Çelebi b. el-Hâc Süleyman, Halil Beşe b. Süleyman, Mustafa Beşe b. Mehmed, diğer Mustafa Beşe b. Mehmed, İbrahim Beşe b. Hüseyin ve gayruhum mine’l-huzzâr. Sevindi v. Duka, Sava Reis v. Yorgi, Nikola Reis v. Hristodoli ve Yorgi v. Dimitri.