Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 313 Hüküm no: 327 Orijinal metin no: [45a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Abdullah’ın vakıf arsasının mutasarrıfları Râfia bt. Ali ile kızı Fâtıma’nın arsayı Mustafa Ağa b. Ahmed’e kiraladıkları Merhûme Fâtıma bt. Abdullah nâm hatun mahmiye-i İstanbul’da Oruc Gāzî Mahallesi’nde vâki‘ bir tarafdan Fâtıma Hanım bt. Mehmed Paşa bostanı ve bir tarafdan müşteri Mustafa Ağa b. Ahmed mülkü ve bir tarafdan Şehrî Mehmed Ağa menzili ve bir tarafdan baʻzan Sitti Hatun mülkü ile mahdûd bir su kuyusu ve bir kenîfe ve mezbûre Sitti Hatun tarafında tûlen yirmi dört ve kadden altı zirâ‘ taş duvarı müştemil arsa-yı hâliyesini vakfiyesi nâtıka olduğu üzere kendisinden sonra Hüseyin ve Emine ibnetey Ömer’e ba‘dehû mezbûr Hüseyin’in ile’l-inkırâz evlâdına ve evlâd-ı evlâdına vakıf ve şart etmekle mezkûr Hüseyin’in evlâdından olup şart-ı vâkıfe üzere arsa-yı mezkûreye mutasarrıfe olan Râfia bt. Ali nâm hatun mahfil-i kazâda Mustafa Ağa b. Ahmed tarafından husûs-ı âti’l-beyânı tasdîka vekîl olduğu el-Hâc Mehmed b. Hüseyin ve Ali b. Mehmed şehâdetleriyle sâbit olan Abdullah Çelebi b. Ali mahzarında ikrâr ve takrîr-i kelâm edip arsa-yı mezbûre üzerine binâya kudretim olmayıp ve binâ için vakf-ı âhar dahi ve meşrûtun-lehimden ancak benim kızım işbu hâzıratü bi’l-meclis Fâtıma’dan gayrı kalmamağla arsa-yı mezkûreyi ba‘de’n-nidâ ve’l-müzâyede ve inkıtâ‘u’r-rağabeti ecr-i misli olan senede dört yüz yirmi akçe mukāta‘a ve dört yüz yetmiş beş guruş icâre-i mu‘accele ile tevliyetim hasebiyle müvekkil-i mezbûr Mustafa Ağa’ya îcâr ve teslîm ve hakk-ı tasarrufumu dahi kendiye fâriğ olup ol dahi ber-vech-i muharrer istîcâr ve kabûl ettiğinden sonra mu‘accele-i mezkûre dört yüz yetmiş beş guruşu mezbûr Mustafa Ağa’dan tamamen ahz u kabz eyledim baʻde’l-yevm emsâli gibi mutasarrıf olsun dedikde gıbbe’t-tasdîkı’l-mer‘î mezbûre Râfia’nın kızı mezkûre Fâtıma Hatun dahi hakk-ı tasarrufumu mezbûr Mustafa Ağa’ya fâriğ oldum dedikde isre’t-tahkīki’ş-şifâhî mâ-vaka‘a bi’t-taleb ketb olundu. Fî 9 min-Cumâdelâhire sene 1121 Şuhûdü’l-hâl: el-Hâc Mehmed b. Hüseyin, es-Seyyid İsmail Efendi b. es-Seyyid Ahmed, Ahmed Efendi b. Halil, Mehmed Efendi b. Ali ve gayruhum mine’l-huzzâr.