Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 313 Hüküm no: 328 Orijinal metin no: [45a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. İbrahim’in, kendi mülkü olmak üzere Mimar Sinan Mahallesi avarız vakfından olup harap durumda olup yeniden inşa ettiği eve yaptığı harcamaların tespiti Husûs-ı âti’z-zikrin mahallinde ketb ü tahrîri iltimâs olunmağın savb-ı şer‘-i mergūbdan Mevlânâ İmâmzâde Mehmed Emin Efendi irsâl olunup ol dahi hâssa mi‘mârlarından es-Seyyid Mustafa Halîfe b. Eyüb ve Şa‘ban Halîfe b. Ali ile mahmiye-i İstanbul’da Mi‘mâr Sinan Mahallesi’nde vâki‘ zikri âtî menzile varıp zeyl-i kitâbda mastûrü’l-esâmî Müslimîn huzûrunda akd-i meclis-i şer‘-i kavîm eyledikde mahalle-i mezbûre sükkânından işbu bâ‘isü’l-kitâb Mehmed Çelebi b. İbrahim nâm kimesne meclis-i ma‘kūd-ı mezkûrda mahalle-i mezbûre avârızı vakfının bi’l-fi‘il mütevellîsi olan Ahmed Çelebi b. Abdullah mahzarında ikrâr ve takrîr-i kelâm edip vakf-ı mezbûrdan olup işbu bir tarafdan Dellâk Mahmud Çelebi tasarrufunda olan vakıf menzil ve bir tarafdan Abdullah Efendi menzili ve bir tarafdan imâma meşrûta vakıf menzil ve bir tarafdan tarîk-i âm ile mahdûd menzil bundan akdem nıkz hükmünde iki bâb odaları müştemil olup mürûr-ı eyyâm ile harâb ve kābil-i süknâ olmayıp ve vakıfda dahi binâya müsâ‘ade olmamağla menzil-i mezbûrun enkāz-ı mevcûdesini mütevellî-i merkūm otuz beş guruşa bana bey‘ ben dahi iştirâ ve kabz edip ve işbu yedimde olan temessük mantûku üzere ihdâs edeceğim ebniye mülküm olmak üzere bi’t-tevliye bana izin verip ben dahi kendi mâlım ile mülküm olmak üzere nefsim için işbu mu‘âyene ve müşâhede olunan beş bâb fevkānî oda ve bir sofa ve dehlîz ve bir bâb tahtânî oda ve bir matbah ve bir kiler ve dehlîzi müceddeden binâ etmeğin hâlâ masrûfum cânib-i şer‘den keşf ve müşâhede ve mesâha ve tahmîn-i sahîh ile tahmîn ve takvîm olunmak murâdımdır dedikde gıbbe’t-tasdîkı’ş-şer‘î mi‘mârân-ı mezbûrân menzil-i mezkûru mesâha ve takvîm eyledikde tûlen ve arzen bi-hesâb-ı terbî‘î üç yüz yirmi iki zirâ‘ cedîd sakfın beher zirâ‘ı altmışar akçeden on dokuz bin üç yüz yirmi akçe ve tûlen ve arzen bi-hesâb-ı mezbûr altmış beş zirâ‘ münakkaş lamba pervâzlı la‘lî boyalı tavanın zirâ‘ı altmışar akçeden üç bin dokuz yüz altmış akçe ve tûlen ve kadden bi-hesâb-ı mezbûr yüz yedi zirâ‘ münakkaş tuğla dolma duvarın beher zirâ‘ı altmışar akçeden altı bin dört yüz yirmi akçe ve tûlen ve arzen bi-hesâb-ı mezbûr otuz zirâ‘ Arabî kanadlı münakkaş masandıra zirâ‘ı altmışar akçeden bin sekiz yüz akçe ve bi-hesâb-ı mezbûr beş zirâ‘ Arabî kanadlı münakkaş dolap ma‘a pervâz zirâ‘ı üçer yüz akçeden bin beş yüz akçe ve rengâmîz ma‘a astar on dört çift cam duvar beher çifti ikişer yüz kırkar akçeden üç bin üç yüz altmış akçe ve bir münakkaş çift dört yüz akçe ve kırk altı zirâ‘ münakkaş açma gülvi? zirâ‘ı otuzar akçeden bin üç yüz seksen akçe ve on iki münakkaş Arabî kanadlı ağaç pencerenin beher penceresi ikişer yüz ellişer akçeden üç bin akçe ve on bir gürgen çârçûbe ma‘a cam beheri yüz ellişer akçeden bin altı yüz elli akçe ve iki münakkaş ocak ma‘a korluk bin ikişer yüz akçeden iki bin dört yüz akçe ve bi-hesâb-ı mezbûr elli iki zirâ‘ iki kat tahta döşeme ma‘a kirişleme zirâ‘ı altmışar akçeden üç bin yüz yirmi akçe ve iki zirâ‘ tırabzan ma‘a boya zirâ‘ı otuzar akçeden altmış akçe ve beş Arabî kanadlı kemer kapı dörder yüz akçeden iki bin akçe ve bi-hesâb-ı mezbûr yüz elli iki zirâ‘ sâde tavan ma‘a boya zirâ‘ı ellişer akçe yedi bin altı yüz akçe ve bi-hesâb-ı mezbûr iki yüz yirmi altı zirâ‘ tahta döşeme zirâ‘ı otuzar akçeden altı bin yedi yüz seksen akçe ve bi-hesâb-ı mezbûr iki yüz yetmiş zirâ‘ sâde dolma duvar ma‘a sıva zirâ‘ı kırkar akçeden on bin sekiz yüz akçe ve yirmi dört zirâ‘ sâde masandıra ma‘a boya zirâ‘ı ellişer akçeden bin iki yüz akçe ve yirmi zirâ‘ gülvi? ma‘a pervâz zirâ‘ı yirmişer akçeden dört yüz akçe ve on bir çift sâde cam duvar beher çifti yüzer akçeden bin yüz akçe ve kırk zirâ‘ ıhlamur tırabzan ma‘a boya zirâ‘ı otuzar akçeden bin iki yüz akçe onar kademeli dört nerdübân beheri beşer yüz akçeden iki bin akçe ve üç sâde ağaç pencere beheri yüz ellişer akçeden dört yüz elli akçe ve iki tahta kanadlı kapı beheri yüz yirmişer iki yüz kırk akçe ve bir Bağdâdî mağsel bin akçe ve iki kenîf beheri bin akçeden iki bin akçe ve bir kemer ocak ma‘a matbah üç bin akçe ve dört sâde cam duvar beheri sekizer akçeden üç yüz yirmi akçe ve bi-hesâb-ı mezbûr yüz doksan sekiz zirâ‘ tahtânîde arşun taş duvar ma‘a sıva zirâ‘ı yetmişer akçeden on üç bin sekiz yüz altmış akçe ve bi-hesâb-ı mezbûr yüz elli zirâ‘ cedîd kaldırım zirâ‘ı on ikişer akçeden bin sekiz yüz akçe ve bir kömürhâne üç yüz akçe ve dört çift misker? ma‘a başlık beheri ikişer yüz akçeden sekiz yüz akçe ve bir kaygan döşemeli abdesthâne üç yüz akçe ve bir sâde ocak üç yüz akçe ve iki Arabî kanadlı demir pencere beheri altışar yüz akçeden [45b] bin iki yüz akçe ve bir Arabî kanadlı mükemmel sokak kapısı bin akçe ve bir Arabî kanadlı orta kapı altı yüz akçe ki min-haysü’l-mecmû‘ bir yük sekiz bin altı yüz yirmi akçe ile ancak husûle gelir bundan noksan ile husûlü mümkün değildir deyü mi‘mârân-ı mezbûrân haber verip ve zeyl-i kitâbda muharrerü’l-esâmî bî-garaz Müslimîn dahi icmâ‘ ve ittifâk eylediklerini mevlânâ-yı mezbûr mahallinde tahrîr ba‘dehû ma‘an ba‘s olunan Mehmed Çelebi b. Abdullah ile cânib-i şer‘a gelip her biri alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Ahmed Efendi b. Receb, Eyüb Ağa b. Mehmed, Mumcu Mehmed Beşe b. Hüseyin, Abdullah Odabaşı b. el-Hâc Mehmed, Mehmed Ağa b. Abdullah, el-Hâc Hüseyin b. Ahmed el-Müezzin ve gayruhum mine’l-huzzâr.