Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 315 Hüküm no: 329 Orijinal metin no: [45b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Çelebi b. Hasan Efendi ile kardeşi Mehmed Çelebi’nin evlerini Mehmed Çelebi b. Hacı İbrahim’e sattıkları Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i enverden Mevlânâ İmâmzâde Mehmed Emin Efendi irsâl olunup ol dahi mahmiye-i İstanbul’da Mi‘mâr Sinan Mahallesi’nde vâki‘ Mehmed Çelebi b. el-Hâc İbrahim nâm kimesnenin menziline varıp zeyl-i vesîkada muharrerü’l-esâmî Müslimîn huzûrlarında akd-i meclis-i şer‘-i nebevî eyledikde kendi tarafından asıl ve karındaşı Mehmed Çelebi b. Hasan Efendi tarafından husûs-ı âti’l-beyânı ikrâra vekîl olduğu Eyüb Ağa b. Mehmed ve Abdi Odabaşı b. Mehmed nâm kimesneler şehâdetleriyle şer‘an sâbit olan Abdullah Çelebi meclis-i ma‘kūd-ı mezbûrda işbu râfi‘u’l-kitâb mezbûr Mehmed Çelebi mahzarında bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin yedimde mülküm olup müşteri-i mezbûr ile bizim menzillerimiz mâ-beyninde olan tûlen ve arzen bi-hesâb-ı terbî‘î işbu yirmi zirâ‘ arsa-yı hâliyeyi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Mehmed Çelebi’ye otuz beş guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm eylediğinden sonra semeni olan meblağ-ı mezbûr otuz beş guruşu bi’l-asâle ve bi’l-vekâle mezbûr Mehmed Çelebi yedinden tamamen ahz u kabz eyledim baʻde’l-yevm arsa-yı hâliye-i mezbûre merkūm Mehmed Çelebi’nin mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î vâki‘ hâli mevlânâ-yı mezbûr mahallinde ketb ü tahrîr ve ma‘an ba‘s olunan Çukadâr Hüseyin b. Oruc ve Muhzır Mehmed Çelebi b. Abdi ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 27 min-Cumâdelûlâ sene 1121 Şuhûdü’l-hâl: Es-sâbikūn, es-sâbikūn, es-sâbikūn