Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 316 Hüküm no: 330 Orijinal metin no: [45b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yorgaki v. Yani’nin urunu yarmalarıyla ölümüne sebep oldukları iddiasıyla Papa Kiryolos v. Mihal ve Hriko v. Anton berberlere dava açan vârislerinin yetmiş guruşa sulh oldukları Mahmiye-i İstanbul’da Sultan Selim kurbünde vâki‘ uncu değirmeninde sâkin iken hâlik olan Yorgaki v. Yani nâm zimmînin verâseti vâlidesi Pagone bt. Hristo’ya ve babası Yani v. Rizo’ya münhasıra olduğu mütehakkık oldukdan sonra merkūme Pagone asâleten ve merkūm Yani tarafından vekâleti İstati v. Noya ve Kosta v. Yorgi şehâdetleriyle sâbit olan diğer İstati v. Obure? nâm zimmî vekâleten mahfil-i kazâda Papa Kiryolos v. Mihal ve Hriko v. Anton nâm zimmîler mahzarlarında her biri ikrâr ve takrîr-i kelâm edip merkūmân Kiryolos ve Hriko hâlik-i merkūmun arkasında uru olmağla ikisini hallâk-ı mu‘teber hâlik-i merkūmun arkasında olan urunu yarmalarıyla hâlik-i merkūm müteessiren hâlik olmağın husûs-ı mezbûru merkūmândan taleb ve da‘vâ ettiğimizde beynimizde nizâ‘-ı küllî vukū‘undan sonra muslihûn tavassut edip merkūmân Kiryolos ve Hriko bizim ile yetmiş guruşa sulh olduklarında biz dahi asâleten ve vekâleten sulh-ı mezbûru kabûl ve bedel-i sulh olan yetmiş guruşu mezbûrân Kiryolos ve Hriko’dan ahz u kabz ettiğimizden sonra husûs-ı mezbûra müte‘allika cemî‘ da‘vâdan asâleten ve vekâleten merkūmân Kiryolos ve Hriko’nun zimmetlerini ibrâ ve iskāt eyledik dediklerinde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 19 min-Cumâdelûlâ sene 1121 Şuhûdü’l-hâl: Es-Seyyid Ali b. Ahmed, Mustafa Çavuş b. ( ), Halil Ağa b. İbrahim, Ali b. Ahmed ve gayruhum mine’l-huzzâr. Papa Yani v. Riga, Yanaki v. Panayot, Todoş v. Kostantin, Yorgaki Kürkçü