Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 317 Hüküm no: 331 Orijinal metin no: [45b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İmam Mustafa Efendi b. Osman ve Süleyman Çelebi b. Yusuf’un komşuları Hacı Hüseyin b. Abdullah ile ortak kullandıkları sokak kapısına Hacı Hüseyin’in yaptığı müdahalenin men edildiği Mahmiye-i İstanbul’da Hoca Halil Attâr Mahallesi’nde sâkin işbu bâ‘isü’l-kitâb İmâm Mustafa Efendi b. Osman ve Süleyman Çelebi b. Yusuf nâm kimesneler meclis-i şer‘-i şerîf-i enverde câr-ı mülâsıkları el-Hâc Hüseyin b. Abdullah mahzarında her biri üzerine da‘vâ ve takrîr-i kelâm edip mahalle-i mezbûrede vâki‘ tarîk-i hâsda olan mülk menzillerimiz ile mezbûr el-Hâc Hüseyin’in menzili aslında bir kimesnenin mülkü olmağla mezbûr el-Hâc Hüseyin’in menzilinin sokak duvarında olan kapı üçümüz beyninde müşterek iken mezbûr el-Hâc Hüseyin mârru’z--zikr kapıyı müstakillen zabt u tasarruf eder suâl olunup ber-vech-i muharrer iştirâken tasarruf etmek üzere mezbûr el-Hâc Hüseyin’e tenbîh olunmak matlûbumuzdur dediklerinde gıbbe’s-suâl ve akībe’l-inkâr müdde‘iyân-ı mezbûrândan müdde‘âlarını mübeyyine beyyine taleb olundukda udûl-i ahrâr-ı ricâl-i Müslimînden ve mahalle-i mezbûre ahâlîsinden Yusuf Çelebi b. Şa‘ban ve Halil Beşe b. Hasan ve Veli Çelebi b. Mustafa ve İsmail Çelebi b. Mehmed nâm kimesneler li-ecli’ş-şehâde meclis-i şer‘a hâzirûn olup istişhâd olunduklarında fi’l-vâki‘ mezbûr el-Hâc Hüseyin’in menzili ile müdde‘iyân-ı mezbûrânın menzilleri kadîmden bir kimesnenin menzili olup sokak duvarında vâki‘ kapı mezbûr el-Hâc Hüseyin ile müdde‘iyân-ı mezbûrân beynlerinde müşterek olup bu ana değin tasarruf edegelmişlerdir biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe’t-ta‘dîl ve’t-tezkiye şehâdetleri makbûle olmağın mûcebince mârru’z--zikr kapıyı ber-vech-i muharrer iştirâken tasarruf edip müstakillen tasarruf ederim deyü bî-vech mu‘âraza ve müdâhaleden mezbûr el-Hâc Hüseyin men‘ olunup mâ-vaka‘a bi’t-taleb ketb olundu. Fî 2 min-Cumâdelâhire sene 1121 Şuhûdü’l-hâl: Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa, Ali Çelebi b. Bâli, Hasan Çelebi b. Abdullah ve gayruhum mine’l-huzzâr.