Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 318 Hüküm no: 332 Orijinal metin no: [45b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Havva bt. Mehmed’in geçinemediği kocası Mehmed Çelebi b. Ebûbekir’den boşandığı Mahmiye-i İstanbul’da Langa kurbünde İne Bey Mahallesi’nde sâkine olup zâtı Hüseyin Çelebi b. Süleyman ve Mehmed Beşe b. Ali nâm kimesneler ta‘rîfleri ile mu‘arrefe olan Havvâ bt. Mehmed nâm kimesneler ma‘rifetleriyle mu‘arrefe olan Havvâ bt. Mehmed nâm hatun meclis-i şer‘-i şerîf-i enverde zevc-i dâhili işbu sâhibü’l-kitâb Mehmed Çelebi b. Ebûbekir mahzarında ikrâr ve takrîr-i kelâm edip zevcim mezbûr Mehmed Çelebi ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan yirmi beş guruş mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm dahi [46a] kendi üzerime olmak üzere zevcim mezbûr Mehmed Çelebi ile muhâla‘a-i sahîha-i şer‘iyye ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete müte‘allika âmme-i de‘âvî ve mutâlebât ve kâffe-i eymân ve muhâsamâtdan ben mezbûr Mehmed Çelebi’nin zimmetini ibrâ-i âmm-ı kātı‘u’n-nizâ‘la ibrâ ve iskāt-ı tamm-ı râfi‘u’l-hısâm ile iskāt eyledim ve mezbûr Mehmed Çelebi dahi kezâlik hukūk-ı zevciyete müte‘allika cemî‘ de‘âvî ve mutâlebât ve kâffe-i eymân ve muhâsamâtdan benim zimmetim ibrâ ve iskāt eyledi fîmâ-ba‘d husûs-ı mezbûra müte‘allik birbirimiz ile vechen mine’l-vücûh kat‘â da‘vâ ve nizâ‘ımız kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 10 min-Cumâdelâhire sene 1121 Şuhûdü’l-hâl: Hasan b. Abdullah, Hüseyin Çelebi b. Süleyman, Mumcu Mehmed Beşe b. Abdurrahman el-Mübâşir, Mustafa Çelebi b. Şa‘ban, Abdullah b. Abdullah ve gayruhum mine’l-huzzâr.