Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 319 Hüküm no: 334 Orijinal metin no: [46a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Ağa b. Osman’ın Hacı İbrahim Odabaşı b. Süleyman’a olan borcunu ödemesi Mahmiye-i İstanbul’da Kadırga Limanı kurbünde sâkin işbu râfi‘u’l-kitâb el-Hâc İbrahim Odabaşı b. Süleyman nâm kimesne mahfil-i kazâda Mehmed Ağa b. Osman nâm kimesne mahzarında üzerine da‘vâ ve takrîr-i kelâm edip mezbûr Mehmed Ağa zimmetinde cihet-i karzdan elli guruş ve beynimizde ma‘lûme eşyâ bahâsından dahi yirmi guruş ki cem‘an yetmiş guruş hakkım olup hattâ meblağ-ı mezbûr bana deyni olduğunu alâ-ruûsi’l-işhâd ikrâr ve işhâd dahi edip yedime temessük verdiğinden sonra meblağ-ı mezbûr[un] dokuz guruşunu ahz u kabz edip altmış bir guruş zimmetinde bâkī kalmağla suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup Sekizinci Cemâ‘at yoldaşlarından Abdullah Beşe b. Ahmed ve Mehmed Beşe b. Mehmed nâm kimesneler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka bundan akdem mezbûr Mehmed Ağa müdde‘î-i mezbûra cihet-i karzdan elli guruş ve beynimizde ma‘lûm eşyâ bahâsından dahi yirmi guruş ki cem‘an yetmiş guruş zimmetimde lâzımü’l-kazâ deynimdir deyü bizim huzûrumuzda ikrâr ve yedine temessük verip bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince meblağ-ı bâkī-i mezbûr altmış bir guruşu müdde‘î-i mesfûra edâ ve teslîme mezbûr Mehmed Ağa’ya tenbîh-birle mâ-vaka‘a bi’t-taleb ketb olundu. Fî 9 min-Cumâdelâhire sene 1121 Şuhûdü’l-hâl: el-Hâc Mustafa Efendi b. ( ), el-Hâc Hüseyin Beşe Çukadâr, el-Hâc Mehmed Çelebi tâbi‘-i efendi, Mehmed Çelebi b. ( ) ve gayruhum mine’l-huzzâr.