Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 320 Hüküm no: 335 Orijinal metin no: [46a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kiryazi v. Kosta’nın şahsî borcu ile kefaletten dolayı olan üç yüz guruşu borçlusu Hacı Mehmed b. Yusuf’a ödemesi Mahmiye-i İstanbul’da Sultan Mahallesi’nde sâkin işbu bâ‘isü’l-kitâb el-Hâc Mehmed b. Yusuf nâm kimesne meclis-i şer‘-i şerîf-i enverde Kiryazi v. Kosta nâm zimmî muvâcehesinde üzerine da‘vâ ve takrîr-i kelâm edip bundan akdem benim mezbûr Kiryazi zimmetinde cihet-i deyn-i şer‘îden yüz elli guruş hakkım olup meblağ-ı mezbûr yüz elli guruşu ve gāib ani’l-meclis Panayot v. Kiryaki zimmetinde deyn-i şer‘îden hakkım olan yüz elli guruşa dahi mezbûr Kiryazi kefîl olmağla meblağ-ı mezbûreyn min-haysü’l-mecmû‘ üç yüz guruş hakkımı hâlâ mezbûr Kiryazi’den taleb ve da‘vâ eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl mezbûr Kiryazi cevâbında fi’l-hakīka cihet-i şer‘îden meblağ-ı mezbûr yüz elli guruş ve ber-vech-i muharrer gāib ani’l-meclis Panayot v. Kiryaki zimmetinde müdde‘î-i mezbûrun hakkı olan yüz elli guruşa dahi bi’l-emr ve’l-kabûl kefîl olmağla min-haysü’l-mecmû‘ üç yüz guruş hâlâ müdde‘î-i mezbûr el-Hâc Mehmed’e zimmetimde lâzımü’l-edâ deynimdir deyü bi-tav‘ihi ikrâr u i‘tirâf etmeğin alâ-mûcebi i‘tirâfihî meblağ-ı mezbûr üç yüz guruşu müdde‘î-i merkūm el-Hâc Mehmed’e edâ ve teslîme mezbûr Kiryazi’ye tenbîh olunup mâ-vaka‘a bi’t-taleb ketb olundu. Fî 8 min-Cumâdelâhire sene 1121 Şuhûdü’l-hâl: Hüseyin b. Abbas, Ahmed Beşe b. Mustafa, Mustafa b. Şa‘ban, Abdullah b. Şa‘ban, Mehmed b. Ahmed ve gayruhum mine’l-huzzâr.