Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 320 Hüküm no: 336 Orijinal metin no: [46b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe bt. Hacı Mehmed’in boşandığı kocası Bahâyîzâde Yahya Said Efendi b. Ahmed Efendi’de olan mehir ve nafaka bedellerini teslim aldığı Mahrûse-i Galata muzâfâtından kasaba-i Kasım Paşa mahallâtından Kulaksız Mahallesi sâkinelerinden Âişe bt. el-Hâc Mehmed nâm hatun tarafından husûs-ı câi’z-zikre vekîl olduğu zât-ı mezbûreyi ma‘rifet-i şer‘iyye ile ârifân Mustafa Efendi b. Musa ve Halil Ağa b. Abdullah şehâdetleriyle şer‘an sâbit olan İbrahim Efendi b. Mustafa nâm kimesne meclis-i şer‘-i şerîf-i enverde müvekkile-i mezbûre Âişe Hatun’un zevci fahrü’l-müderrisîni’l-kirâm Bahâyîzâde Yahya Said Efendi b. el-merhûm Ahmed Efendi tarafından tasdîk-i âti’l-beyâna vekîl olduğu Hüseyin Efendi b. Mehmed ve Abdurrahman Efendi b. İbrahim Efendi şehâdetleriyle şer‘an sâbit olan Hüseyin Efendi b. Abdüsselam mahzarında bi’l-vekâle ikrâr ve takrîr-i kelâm edip müvekkilem mezbûre Âişe Hatun’un zevci merkūm Yahya Said Efendi müvekkilem mezbûreyi bâyinen tatlîk etmekle zimmetinde mütekarrer ve ma‘kūdün-aleyh olan on iki bin akçe mehr-i müecceli ve nafaka-i iddet ve meûnet-i süknâsı için bi’t-terâzî ta‘yîn olunan bin akçe ki cem‘an on üç bin akçe hakkını vekîl-i mezbûr Hüseyin Efendi bana def‘ ü teslîm ben dahi müvekkilem mezbûre Âişe <> Hatun için vekîl-i mezbûr yedinden tamamen ahz u kabz eyledim baʻde’l-yevm müvekkilem mezbûre Âişe Hatun’un merkūm Yahya Said Efendi ile hukūk-ı zevciyete ve gayra müte‘allika vechen mine’l-vücûh ve sebeben mine’l-esbâb da‘vâ ve nizâ‘ları kalmayıp husûs-ı mezbûra ve sâir beynlerinde cereyân eden ahz u i‘tâya müte‘allika olan âmme-i da‘vâdan târih-i kitâba gelince her biri âharın zimmetini ibrâ-i âmm-ı râfi‘u’l-hısâm ile ibrâ ve iskāt eylediler dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 11 min-Cumâdelâhire sene 1121 Şuhûdü’l-hâl: Mehmed Efendi b. Mehmed, Eyüb Efendi b. Ali, Hüseyin b. Mehmed, İbrahim Efendi b. Mustafa, İbrahim b. Receb, Abdurrahman b. İbrahim, Berber Ali Çelebi b. Mehmed, Kalaycı Mustafa Beşe b. Ramazan, Mustafa Çelebi b. Şa‘ban ve gayruhum mine’l-huzzâr.