Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 321 Hüküm no: 337 Orijinal metin no: [46b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdurrahman b. Mehmed’in, hanımı Ayşe’yi cariye olarak sattığı iddiasıyla Ahmed Beşe b. Mustafa’ya açtığı davadan vazgeçtiği Mahmiye-i İstanbul’da Küçükkaraman’da vâki‘ Paşa Hanı’nda müsâferet vechi üzere sâkin Abdurrahman b. Mehmed nâm kimesne meclis-i şer‘-i şerîf-i enverde işbu râfi‘u’l-vesîka Ahmed Beşe b. Mustafa nâm kimesne mahzarında ikrâr ve takrîr-i kelâm edip bundan akdem mezbûr Ahmed Beşe zevcem gāibetü ani’l-meclis Âişe nâm hatunu ayardıp âhar diyâra götürüp câriye-i memlûkesi olmak üzere bey‘ etmişidi deyü mezbûr Ahmed Beşe’den da‘vâya tasaddî etmişidim el-hâletü hâzihî husûs-ı mezbûrda merkūm Ahmed Beşe’nin sun‘ ve fi‘li olmadığına ilmim lâhık olmağın da‘vâ-yı mezkûremden fâriğ olup husûs-ı mezbûra müte‘allika da‘vâdan zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 8 min-Cumâdelâhire sene 1121 Şuhûdü’l-hâl: Mustafa Çelebi b. İsmail, Ali Çelebi b. İvaz, Ali Çelebi b. Bâli, Abdullah b. Abdullah, Hasan el-Muhzır ve gayruhum mine’l-huzzâr.