Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 322 Hüküm no: 338 Orijinal metin no: [46b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Ahmed ile kocası Ali Beşe b. Mehmed ve kardeşi Mehmed Beşe’nin evlerini açtıkları iddiasıyla kendileri aleyhine dava açan Hacı İbrahim Efendi b. Mustafa ile hanımı Ayşe bt. Ahmed ve kayın anası Kamer’in davalarından vazgeçtikleri Mahmiye-i İstanbul’da Neslişah Mahallesi’nde sâkine Fâtıma bt. Ahmed nâm hatun tarafından husûs-ı âti’l-beyânı ikrâra vekîl olduğu Ömer b. Hasan ve İbrahim b. Murad nâm kimesneler şehâdetleriyle şer‘an sâbit olan el-Hâc Mustafa b. Halil ile müvekkile-i mezbûrenin zevci Ali Beşe b. Mehmed ve mezbûrenin karındaşı Mehmed Beşe nâm kimesneler mahfil-i kazâda ashâb-ı hâze’l-kitâb el-Hâc İbrahim Efendi b. Mustafa ve zevcesi Âişe bt. Ahmed ve kayın anası Kamer bt. Abdullah mahzarlarında her biri bi’l-asâle ve bi’l-vekâle ikrâr ve takrîr-i kelâm edip bundan akdem mezbûrûn İbrahim Efendi ve zevcesi Âişe ve kayın anası Kamer menzilimiz açılıp siz mazannemizsiz deyü bizden da‘vâya tasaddî etmişler idi biz dahi arabamız önüne gelmek ile zevcemden sakat vâkı‘a olmuş idi deyü mezbûrûndan kezâlik da‘vâya tasaddî olmuşidik el-hâletü hâzihî her birimiz bi’l-asâle ve bi’l-vekâle da‘vâ-yı mezbûremizden fâriğler olup husûs-ı mezkûra ve târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûle müte‘allika âmme-i da‘vâdan biz bi’l-asâle ve bi’l-vekâle mezbûrûnun zimmetlerini ibrâ ve iskāt edip onlar dahi kezâlik sirka da‘vâsına ve sâir târih-i kitâba gelince beynimizde cereyân eden ahz u i‘tâ ve mu‘âmelât-ı şettâ ve hukūk-ı ma‘lûme ve mechûleye müte‘allika âmme-i da‘vâdan bizim zimmetimizi ibrâ-i âm ile ibrâ ve iskāt eylediler min-ba‘d birbirimiz ile vechen mine’l-vücûh ve sebeben mine’l-esbâb aslâ ve kat‘â birbirimiz ile da‘vâ ve nizâ‘ımız yokdur dediklerinde gıbbe’t-tesâdıki’ş-şer‘î mâ-vaka‘a bi’t-taleb ketb olundu. Fî 10 min-Cumâdelâhire sene 1121 Şuhûdü’l-hâl: Es-Seyyid el-Hâc Mustafa Efendi b. es-Seyyid Mehmed İmâm-ı mahalle, Hasan Efendi b. Ali İmâm-ı mahalle-i Keçeci Pîrî, Mustafa Efendi b. Mehmed el-Müezzin, İbrahim Çelebi b. Mustafa, İbrahim Çelebi b. Abdi, Hasan Beşe b. Mustafa, İbrahim Çelebi b. Şa‘ban, Hasan Beşe b. Mehmed Çukadâr, Mustafa Çelebi b. Şa‘ban, Receb Çelebi b. Süleyman, Ali Çelebi b. İvaz, Ali Çelebi b. Bâli.