Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 323 Hüküm no: 340 Orijinal metin no: [46b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Felçli Ayşe Hatun bt. Hasan Odabaşı’nın nafaka ve hizmetçi temini için vâlidesi Sâliha’dan intikal eden iki dükkan ve evin satılması için vasiyyesi ve kardeşi olanÜmmühâni’ye izin verildiği Mahmiye-i İstanbul’da el-Hâc Bayram Kaftanî Mahallesi’nde sâkine zâtı ta‘rîf-i şer‘î ile mu‘arrefe olan Ümmühani bt. Hasan Odabaşı nâm hatun mahfil-i kazâda takrîr-i kelâm ve tâʻbir ani’l-merâm edip bâ-hüccet-i şer‘iyye kıbel-i şer‘den vasiyyesi olduğum kız karındaşım Âişe nâm hatunun zarûret-i nafaka ve hâdimesi olma[ma]ğın vâlidemiz müteveffât-ı mezbûre Sâliha’dan intikāl-ı âdî ile intikāl edip el-Hâc Osman nâm sâhibü’l-hayrın vakfından olup Koca Mustafa Paşa sûkunda vâki‘ iki bâb dükkânı ve bir bâb menzilde olan nısf hissesi bedel-i misli ile âhara ferağ ve bedeli ile hâdime ve nafaka alınıp infâk olunmak meflûce-i mecnûne-i mezbûre Âişe hakkında her vechile evlâ ve enfa‘ olduğu bî-garaz Müslimînden istihbâr olunup haberleri tahrîr ve bana bi’l-vesâye izin verilmek matlûbumdur dedikde hâl mahalle-i mezbûre ahâlîsinden [47a] İmâm Salih Efendi b. Yahya ve Müezzin Mehmed Halîfe b. Ahmed ve Hüseyin Efendi b. Abdullah ve Mustafa b. Halil ve Mehmed Beşe b. Hüseyin ve Bayram Ağa b. Abdullah nâm kimesneler li-ecli’l-ihbâr meclis-i şer‘a hâzirûn olup istihbâr olunduklarında fi’l-vâki‘ meflûce-i mecnûne-i mezbûre Âişe’nin zarûret-i nafakası olup ve hâdimesi dahi olmamağla zikri mürûr eden iki bâb dükkân ve bir bâb menzilde olan nısf hissesi bedel-i misli ile âhara ferağ ve bedeli ile hâdime alınıp ve infâk olunmak her vechile mezbûre hakkında evlâ ve enfa‘dır deyü her biri alâ-tarîkı’ş-şehâde haber vermeleri ile mârru’z--zikr dükkânları ve menzili bedel-i misli ile âhara ferağ ve bedeli ile hâdime alınıp ve infâka mezbûre Ümmühani’ye izin ver[il]meğin mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Mustafa b. Şa‘ban, Ali Çelebi b. Bâli, Hasan Çelebi b. Mustafa, Ali Çelebi b. İvaz, Süleyman Çelebi b. Abdullah ve gayruhum mine’l-huzzâr.