Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 324 Hüküm no: 341 Orijinal metin no: [47a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Felçli Ayşe Hatun’un bakımı ve mallarının muhafazası için kız kardeşi Ümmühani bt. Hasan Odabaşı’nın vasî tayin edildiği Mahmiye-i İstanbul’da el-Hâc Bayram Kaftanî Mahallesi’nde sâkine zâtı ta‘rîf-i şer‘î ile mu‘arrefe olan işbu bâ‘isetü’l-kitâb Ümmühani bt. Hasan Odabaşı nâm hatun mahfil-i kazâda takrîr-i kelâm ve tâʻbir ani’l-merâm edip li-ebeveyn kız karındaşım olup bundan akdem meflûce [ve] mecnûne olan gāibetü ani’l-meclis Âişe nâm hatun bir vechile kendi umûrunu ikāmete kādire olmayıp emvâl ve eşyâsını zabt ve ahvâlini hıfz için kıbel-i şer‘den bir vasî nasbı lâzım ve mühim olmağın meflûce-i mecnûne-i mezbûre üzerine vasî nasb olunmak matlûbumdur dedikde hâl minvâl-i muharrer üzere olduğunu zeyl-i kitâbda muharrerü’l-esâmî Müslimîn ihbâr etmeleriyle hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri meflûce-i mecnûne üzerine kız karındaşı olup umûr-ı vesâyete kādire olan mezbûre Ümmühani Hatun’u vasî nasb u ta‘yîn eyledikde ol dahi vesâyet-i mezbûreyi kabûl ve merâsimini edâya ta‘ahhüd ve iltizâm etmeğin mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Eş-şâhidûnü’s-sâbıkūn, es-sâbikūnü’ş-şâhidûn, eş-şâhidûnü’s-sâbıkūn