Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 324 Hüküm no: 342 Orijinal metin no: [47a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halime bt. Mustafa Efendi’nin boşandığı kocası Mehmed b. Hasan’ın ödemesi şartıyla çocukları Mustafa’nın ihtiyaçları için nafaka tayin edildiği Mahmiye-i İstanbul’da Kâtib Muslihiddin Mahallesi’nde sâkine olup zâtı ta‘rîf-i şer‘î ile mu‘arrefe olan Havvâ bt. Ahmed nâm hatun mahfil-i kazâda takrîr-i kelâm ve tâʻbir ani’l-merâm edip kızım Halime bt. Mustafa Efendi nâm hatunun zevc-i sâbıkı Mehmed b. Hasan nâm kimesnenin firâşından hâsıl ve kızım mezbûre Halime’den mütevellid sagīr oğlu Mustafa bi-hakkı’l-hıdâne hâlâ hacr u terbiye[m]de olup nafakaya eşedd-i ihtiyâcı olmağla nafaka ve kisve ve sâir levâzım-ı mühimmesi için gāib ani’l-meclis Mehmed üzerine cânib-i şer‘den kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīr-i mezbûr için târih-i kitâbdan beher yevm yedişer akçe nafaka farz ve takdîr edip meblağ-ı mefrûz-ı mezbûru sagīr-i mezbûrun levâzımına harc u sarfa ve lede’l-iktizâ istidâneye ve inde’z-zafer babası gāib-i mezbûr Mehmed üzerine rücû‘a mezbûre Havvâ’ya izin vermeğin mâ-vaka‘a bi’t-taleb ketb olundu. Fî 11 min-Cumâdelâhire sene 1121 Şuhûdü’l-hâl: Mustafa b. Şa‘ban, İbrahim b. Mustafa, Yusuf b. Abdullah, Ali b. Şa‘ban, Ali b. İvaz ve gayruhum mine’l-huzzâr.