Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 325 Hüküm no: 343 Orijinal metin no: [47a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dergâh-ı âlî yeniçerileri hulefasından Numan Efendi b. Abdülbari’nin ortak oldukları evdeki hissesini Hadice bt. Osman b. Mehmed’e sattığı Mahmiye-i İstanbul’da Kasab İvaz Mahallesi’nde sâkin ve Dergâh-ı âlî dâme mahfûfen bi’l-me‘âlî yeniçerileri hulefâlarından Numan Efendi b. Abdülbârî nâm kimesne meclis-i şer‘-i şerîf-i enverde fahrü’l-muhadderât hâfızatü hâze’l-kitâb Hadice bt. Osman b. Mehmed nâm hatun tarafından husûs-ı âti’z-zikre vekîl olduğu zât-ı mezbûreyi ma‘rifet-i şer‘iyye ile ârifân es-Seyyid İbrahim Efendi b. es-Seyyid Murad ve Ahmed Çelebi b. Hanefî nâm kimesneler şehâdetleriyle sâbit olan Hüseyin Efendi b. Ali nâm kimesne mahzarında ikrâr-ı tâm ve takrîr-i kelâm edip akd-i âti’l-beyânın sudûruna değin yedimde mülk ve hakkım olup mahalle-i mezbûrede vâki‘ bir tarafdan mahalle-i mezbûre imâmına meşrûta vakıf menzil ve bir tarafdan Neccârî Mehmed Subaşı Vakfı olan odalar ve bir tarafdan Ümmühani Hatun tasarrufunda olan menzil ve bir tarafdan tarîk-i âm ile mahdûd dâhiliyesinde iki bâb fevkānî oda ve bir matbah ve bi’r-i mâ ve havlu ve hâriciyesinde iki bâb fevkānî oda ve bir kiler ve bir anbar ve bir ahır ve bir samanhâneyi müştemil mülk menzilin nısfı benim mülküm ve nısf-ı âharı müvekkile-i mezbûre Hadice Hatun’un mülkü olup menzil-i mahdûd-ı mezkûrda olan nısf hisse-i şâyi‘amı bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî <> şürût-ı müfsideden ârî bey‘-i bâtt-ı sahîh-i şer‘î ile vekîl-i mezbûr Hüseyin Efendi’ye üç yüz kırk beş guruşa bey‘ ve temlîk ve teslîm ol dahi ber-vech-i muharrer bi’l-vekâle iştirâ ve temellük ve tesellüm ve kabz ve kabûl eylediğinden sonra semeni olan meblağ-ı mezbûr üç yüz kırk beş guruşu vekîl-i mezbûr Hüseyin Efendi yedinden tamamen ahz u kabz eyledim baʻde’l-yevm menzil-i mahdûd-ı mezkûrun mecmû‘u cemî‘ müştemilâtıyla müvekkile-i mezbûrenin mülk-i müşterâsı olmuşdur benim kat‘â alâka ve medhalim yokdur keyfe mâ teşâ ve hasbe-mâ tahtâr mutasarrıfe olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 6 min-Cumâdelâhire sene 1121 Şuhûdü’l-hâl: Mehmed Efendi b. el-Hâc Mustafa, diğer Mehmed Efendi b. Yusuf, Hasan Halîfe b. Mahmud, Ali Ağa b. Abdi, Eyüb b. Hüseyin, es-Seyyid Şa‘ban Halîfe b. Mahmud, Ahmed Çelebi b. Halil, Halil Beşe b. İbrahim, Ahmed Çelebi b. Halil, Hüseyin b. Habib ve gayruhum mine’l-huzzâr.