Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 329 Hüküm no: 349 Orijinal metin no: [48a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdullah Efendi b. Yakub b. Ahmed ile İsmail Çelebi b. Ahmed b. Bâli’nin veraset davasında kendi yerlerine Üskübî kazasında şahitlik yapmak üzere Abdullah Halîfe b. Ahmed ile Osman b. Ahmed’i vekil tayin ettikleri Zikri âtî husûsa şâhidîn-i asıl olup mahmiye-i İstanbul’da Koğacı Dede Mahallesi sâkinlerinden Abdullah Efendi b. Ya‘kub b. Ahmed ve mahmiye-i mezbûrede Edirnekapısı kurbünde vâki‘ el-Hâc Muhyiddin Mahallesi sâkinlerinden İsmail Çelebi b. Ahmed b. Bâli nâm kimesneler mahfil-i kazâda Abdullah Halîfe b. Ahmed ve Osman b. Ahmed nâm kimesneler mahzarlarında her biri takrîr-i kelâm ve tâʻbir ani’l-merâm edip vilâyet-i Anadolu’da Üskübî kasabasında vâki‘ Orta Mahallesi’nde sâkine iken bundan akdem vefât eden Âmine bt. İbrahim nâm hatunun verâseti li-ebeveyn er karındaşları Ahmed ve el-Hâc Mehmed’e münhasıra ve terekesinin nısfı mezkûr Ahmed’e ve nısf-ı âharı mezkûr el-Hâc Mehmed’e isâbet eylediği şer‘an zâhir ve mütehakkık oldukdan sonra mezkûr Ahmed müteveffât-ı mezbûrenin terekesine vâzı‘u’l-yed olmağla merkūm el-Hâc Mehmed menkūl terekesinden kendiye isâbet eden nısf hisessini baʻde’l-ahz ve’l-kabz beynlerinde ma‘lûm kırk guruş da‘vâsından tavassut-ı muslihîn ile karındaşı mezbûr Ahmed ile beş guruş üzerine sulh olup bedel-i sulh-ı mezbûru merkūm Ahmed yedinden ahz u kabz eylediğinden sonra kız karındaşı müteveffât-ı mezbûrenin terekesine ve vâlideleri olup bundan akdem vefât eden Akkadın bt. el-Hâc Mahmud’un terekesinden kendilere intikāl eden debbağhâneye ve sâir beynlerinde cereyân eden ahz u i‘tâ ve mu‘âmelât-ı şettâya müte‘allika cemî‘ da‘vâdan mezbûr Ahmed’in zimmetini ibrâ-i âm ile ibrâ ve iskāt etmekle biz bu husûsa bu vech üzere şâhidler olup lâkin kasaba-i mezkûre müddet-i sefer-i ba‘îd olmağla bizim için mahallinde edâ-yı şehâdet-i şer‘iyye müte‘azzir olmağın hâlâ bizim her birimiz şehâdetimizi mezkûrân Abdullah Halîfe b. Ahmed ve Osman b. Ahmed’den her birine bizim lisânımızdan edâ-yı şehâdet-i şer‘iyye etmek üzere tahmîl ve mezkûrândan her biri vech-i meşrûh üzere şehâdetimizi tahammül ve mahallinde edâ-yı şehâdet-i şer‘iyye etmek üzere ta‘ahhüd eylediler dediklerinde gıbbe’t-tasdîkı’l-mer‘î mâ-vaka‘a bi’t-taleb ketb olundu Fî 14 min-Cumâdelâhire sene 1121 Şuhûdü’l-hâl: Ali Efendi b. Hüseyin, Osman b. Ahmed, es-Seyyid Mustafa b. es-Seyyid Mahmud Efendi, Halil b. Mustafa ve gayruhum mine’l-huzzâr.