Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 330 Hüküm no: 350 Orijinal metin no: [48a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. İbrahim’in talebiyle evlatlığı Ümmühâni’ye nafaka tayin edildiği Mahmiye-i İstanbul’da Üskübî Mahallesi’nde sâkin işbu hâfızü’l-kitâb Ali b. İbrahim nâm kimesne meclis-i şer‘-i şerîf-i enverde takrîr-i kelâm ve tâʻbir ani’l-merâm edip bi-tarîkı’t-tebennî hâlâ hacr ve terbiyemde olan Ümmühani bt. Ali nâm sagīre nafaka ve kisveye eşedd-i ihtiyâc ile muhtâc olmağla kıbel-i şer‘den men lehü’t-taleb üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri dahi sagīre-i mezbûrenin nafaka ve kisve ve sâir levâzım-ı zarûriyesîçün târih-i kitâbdan beher yevm ikişer para nafaka ve kisve-bahâ farz ve takdîr edip meblağ-ı mefrûz-ı mezbûru sagīre-i mezbûrenin nafaka ve kisve ve sâir levâzımına harc u sarfa ve lede’z-zarûre istidâneye ve inde’z-zafer men lehü’t-taleb üzerine rücû‘a merkūm Ali’ye izin vermeğin mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Mehmed b. Ahmed, Mustafa Çelebi b. Şa‘ban, Süleyman b. Abdullah, Ali b. İvaz, Ali b. Bâli ve gayruhum mine’l-huzzâr.