Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 331 Hüküm no: 352 Orijinal metin no: [48a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Mustafa b. Ahmed ile Hacı Abdullah Ağa b. İbrahim b. Ali arasındaki alacak-verecek davasında sulh oldukları Medîne-i Eyüb’de Baba Haydar Mahallesi’nde sâkin el-Hâc Mustafa b. Ahmed nâm kimesne mahfil-i kazâda işbu râfi‘u’l-kitâb el-Hâc Abdullah Ağa b. İbrahim b. Ali nâm kimesne tarafından husûs-ı âti’l-beyânı tasdîka vekîl olduğu el-Hâc Ali b. Ömer ve Mustafa Ağa b. Ahmed nâm kimesneler şehâdetleriyle şer‘an sâbit olan Molla Mustafa b. Ali nâm kimesne mahzarında ikrâr ve takrîr-i kelâm edip bundan akdem cihet-i karz-ı şer‘îden zimmetinde dört yüz otuz guruş hakkım vardır deyü müvekkil-i mezbûrdan da‘vâ eylediğimde ol dahi inkâr etmekle beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni müvekkil-i mezbûr el-Hâc Abdullah Ağa ile elli guruş kıymetli bir sim kılıç ve otuz nakd guruş üzerlerine sulh eylediklerinde ben dahi sulh-ı mezbûru kabûl ve bedeleyn-i mezkûreyn olan mârru’z--zikr kılıç ve otuz guruşu müvekkil-i mezbûr yedinden tamamen ahz u kabz edip husûs-ı mezkûra müte‘allika âmme-i de‘âvî ve mutâlebât ve eymân ve muhâsamâtdan müvekkil-i mezbûrun zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm müvekkil-i mezbûr ile aslâ da‘vâ ve nizâ‘ım yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: el-Hâc Ali Ağa b. Ömer, Mustafa Ağa b. Ahmed, Ahmed Ağa b. İbrahim, Ali Beşe b. Hasan, Mehmed Beşe b. Ali el-Mübâşir, Ömer b. Süleyman, Ali b. Ahmed, Mustafa b. Şa‘ban, Ali b. Bâli ve gayruhum mine’l-huzzâr.