Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 331 Hüküm no: 353 Orijinal metin no: [48b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Şa‘ban’ın talebiyle boşandığı kocası Yusuf Ağa b. Mahmud’un ödemesi şartıyla kızları Ayşe’ye nafaka takdir edildiği Mahmiye-i İstanbul’da Kâtib Muslihiddin Mahallesi’nde sâkine zâtı ta‘rîf-i şer‘î ile mu‘arrefe olan işbu râfi‘atü’l-kitâb Hadice bt. Şa‘ban nâm hatun mahfil-i kazâda zevc-i sâbıkı Yusuf Ağa b. Mahmud mahzarında takrîr-i kelâm ve tâʻbir ani’l-merâm edip zevcim mezbûrun firâşından hâsıla ve benden mütevellide bi-hakkı’l-hıdâne hacr ve terbiyemde olan işbu sadriye sagīre kızım Âişe’nin nafaka ve kisveye eşedd-i ihtiyâcı olmağla kıbel-i şer‘den babası mezbûr üzerine kadr-i ma‘rûf nafaka ve kisve-bahâ farz ve takdîr olunmak matlûbumdur dedikde hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri târih-i kitâbdan beher yevm sagīre-i mezbûrenin nafaka ve kisvesiʼçün babası mezbûr üzerine ikişer para farz ve takdîr edip meblağ-ı mefrûz-ı mezkûru sagīre-i mezbûrenin nafaka ve kisve ve sâir levâzım-ı zarûriyyesine harc u sarfa ve lede’l-iktizâ istidâneye ve inde’z-zafer babası mezbûr üzerine rücû‘a mezbûre Hadice’ye izin vermeğin mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Ömer b. Ahmed, Mustafa b. Şa‘ban, Hasan b. Mustafa, Ali b. Bâli, Hasan b. Abdullah, Ali b. İvaz ve gayruhum mine’l-huzzâr.