Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 332 Hüküm no: 355 Orijinal metin no: [48b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Râbia bt. Ramazan’ın boşandığı kocası Osman b. Mehmed’e açtığı eşya davasında sulh oldukları Mahmiye-i İstanbul’da el-Hâc Muhyiddin Mahallesi’nde sâkine olup zâtı ta‘rîf-i şer‘î ile mu‘arrefe olan Râbia bt. Ramazan nâm hatun mahfil-i kazâda zevc-i sâbıkı işbu râfi‘u’l-kitâb Osman b. Mehmed nâm kimesne mahzarında ikrâr ve takrîr-i kelâm edip bundan akdem mezbûr Osman beni bâyinen tatlîk etmekle eşyâ-i memlûkemden bir köhne çuka ferâce ve bir beyaz baş makramesi ve bir hamam rahtı ve bir peştamâlım yedinde kalıp hâlâ taleb ve da‘vâ sadedinde olduğumda beynimizde münâza‘ât-ı kesîre cereyân etmişidi el-hâletü hâzihî beynimize muslihûn tavassut edip da‘vâ-yı mezkûremden beni zevc-i sâbıkım mezbûr Osman ile üç guruş üzerine sulh eylediklerinde ben dahi sulh-ı mezbûru kabûl ve bedel-i sulh olan meblağ-ı mezbûr üç guruşu zevc-i sâbıkım mezbûr Osman yedinden tamamen ahz u kabz edip eşyâ-i muharrere-i mezkûreye müte‘allika da‘vâdan zevc-i sâbıkım mezbûr Osman’ın zimmetini ibrâ ve iskāt eyledim dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 15 min-Cumâdelâhire sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Süleyman b. Abdullah, Çalık Mehmed, Ali Çelebi b. Bâli ve gayruhum mine’l-huzzâr.