Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 333 Hüküm no: 356 Orijinal metin no: [48b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Bey b. Mustafa’nın vefât eden Hacı Hasan b. Abdullah’da alacağı olduğu ve kefaleti hasebiyle oğlu Ahmed’in ödemesi talebiyle açtığı davayı ispat edemediği Mahmiye-i İstanbul’da Ma‘cûnî Kasım Mahallesi’nde sâkin Hüseyin Ağa etbâ‘ından Ali Bey b. Mustafa nâm kimesne mahfil-i kazâda mahrûse-i Galata muzâfâtından kasaba-i Kasım Paşa mahallâtından Büyük Piyale Paşa Mahallesi sâkinlerinden olup medîne-i Sofya’da ticâret vechi üzere iken bundan akdem fevt olan el-Hâc Hasan b. Abdullah’ın oğlu Ahmed nâm kimesne mahzarında üzerine da‘vâ ve takrîr-i kelâm edip müteveffâ-i mezbûr el-Hâc Hasan zimmetinde bin yüz yirmi senesi Muharrem’inde vilâyet-i Rumeli’nde Rusçuk kasabasında vâki‘ Ali Paşa hanında yedimden iştirâ ve kabz eylediği vezn ve mikdârı beynimizde ma‘lûm üç yük duhân bahâsından yüz otuz iki buçuk guruş hakkıma tarafeynden emr ve kabûlü hâviye kefâlet-i sahîha-i şer‘iyye ile oğlu mezbûr Ahmed kefîl olmağla meblağ-ı mezbûru kefâletine binâen merkūm Ahmed’den taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl ve akībe’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyine için izhâr-ı acz edip istihlâf etmekle fi’l-hakīka müdde‘î-i mezbûrun müteveffâ-i mezbûr el-Hâc Hasan zimmetinde olan üç yük duhân bahâsından meblağ-ı mezbûr yüz otuz iki buçuk guruş hakkına ber-vech-i muharrer kefîl olmayıp ol cihetden müdde‘î-i mezbûra edâsı lâzım deyni olmadığına merkūm Ahmed’e yemîn teklîf olundukda ol dahi hasbe’l-mesûl yemîn biʼllâhi’l-aliyyi’l-a‘lâ etmeğin mûcebince merkūm Ali Bey bilâ-beyyine bî-vech mu‘ârazadan [men‘] olunup mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli, Mehmed Ağa el-Mübâşir, es-Seyyid Mehmed b. es-Seyyid Hasan, İbrahim b. Abdülkerim, Hüseyin b. Ali.