Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 334 Hüküm no: 357 Orijinal metin no: [48b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali Paşa Değirmeni kiracısı olup firar eden Hasan b. Mehmed’e kayyum tayin edilen Hüseyin Çelebi b. Hacı Hasan’ın talebiyle değirmendeki eşya ve hayvanların satışına izin verildiği Mahmiye-i İstanbul’da Zeyrek kurbünde vâki‘ Ali Paşa değirmeni demekle ma‘rûf değirmende müstecir iken bundan akdem firâr ve gaybet eden Hasan b. Mehmed nâm kimesnenin eşyâsını hıfza kıbel-i şer‘den kayyûm nasb olunan işbu bâ‘isü’l-vesîka Hüseyin Çelebi b. el-Hâc Hasan nâm kimesne meclis-i şer‘de takrîr-i kelâm ve bast-ı merâm edip gāib-i mezbûrun zikr olunan değirmende mevcûde olan bârgir ve eşyâsını taraf-ı şer‘den tahrîr ve hıfz için bana teslîm olunup lâkin eşyâ-i mezbûrenin hıfzı asîr ve bârgirleri infâk mümkün olmamağla bir re’s bârgir dahi helâk olmağla hâlâ yedimde mevcûd olan sekiz re’s bârgir ve ber-mûceb-i defter baʻzı eşyâ-i ma‘lûmeyi âhara bey‘ ve semenleri hıfz olunmak için kıbel-i şer‘den bana [49a] izin verilmek murâdımdır deyüp ve husûs-ı mezbûr bâlâda tafsîl olunduğu vech üzere olduğunu zeyl-i kitâbda muharrerü’l-esâmî bî-garaz Müslimîn haber vermeleriyle mezbûr Hüseyin Çelebi’ye ber-vech-i muharrer kıbel-i şer‘den izin-birle mâ-vaka‘a bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: Yiğitbaşı Yahya Çelebi b. el-Hâc Ahmed, Mehmed Çelebi b. Hüseyin, Ahmed Odabaşı b. Mehmed, el-Hâc Receb b. Abdurrahim, Mustafa Çelebi b. Ahmed ve gayruhum mine’l-huzzâr.