Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 334 Hüküm no: 358 Orijinal metin no: [49a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi b. Hacı Hasan’ın kayyumu olduğu Ali Paşa değirmeni kiracısı Hasan b. Mehmed’in değirmendeki eşya ve hayvanlarını Hacı Abdullah b. Hacı Ali’ye sattığı Mahmiye-i İstanbul’da Zeyrek kurbünde vâki‘ Ali Paşa değirmeni demekle ma‘rûf değirmende müstecir iken bundan akdem firâr ve gaybet eden Hasan b. Mehmed nâm kimesnenin eşyâsını hıfza kıbel-i şer‘den kayyûm nasb olunan Hüseyin Çelebi b. el-Hâc Hasan nâm kimesne meclis-i şer‘-i şerîf-i enverde işbu bâ‘isü’l-vesîka el-Hâc Abdullah b. el-Hâc Ali mahzarında ikrâr ve takrîr-i kelâm edip gāib-i mezbûrun eşyâsını ber-mûceb-i defter taraf-ı şer‘den hıfz için bana teslîm olunup ve hıfzı asîr ve telef olması muhtemel olanları dahi semen-i misilleri ile âhara bey‘e yine taraf-ı şer‘den bana izin ve hüccet-i şer‘iyye verilmeğin hâlâ gāib-i mezbûrun eşyâsından sekiz re’s bârgir ve yedi elek ve beş kalbur ve bir harrat ve bir vezne ve iki kıl elek ve üç şinik ve bir semer ve bir demir kandil ve iki at şalı ve iki yular ve bir su koğası ve dört çuval ve dört çul ve bir su fıçısı ve iki ağaç koğa ve üç iskemle ve bir pîştahta ve bir akçe tahtasını bi-safkatin vâhidetin altmış guruşa mezbûr el-Hâc Abdullah’a bey‘ ve teslîm ol dahi ber-vech-i muharrer iştirâ ve temellük ve kabûl eylediğinden sonra semen-i mezbûru bi’t-tamam yedinden ma‘rifet-i şer‘le ahz u kabz eyledim dedikde gıbbe’t-tasdîkı’ş-şer‘î zeyl-i kitâbda muharrerü’l-esâmî Müslimîn meclis-i şer‘a gelip meblağ-ı mezbûr eşyâ-yı mezbûrenin semen-i mislidir deyü haber vermeleriyle mâ-vaka‘a bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: Es-sâbikūn, es-sâbikūn, es-sâbikūn.