Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 335 Hüküm no: 359 Orijinal metin no: [49a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin Çelebi b. Ömer’in evinin yarısı ile bir çift öküzünü hanımı Fâtıma Hatun bt. Mehmed’e sattığı Mahmiye-i İstanbul’da Molla Gürânî Mahallesi’nde sâkin Hüseyin Çelebi b. Ömer nâm kimesne mahfil-i kazâda zevce-i menkûhası işbu râfi‘atü’l-vesîka Fâtıma bt. Ömer nâm hatun tarafından husûs-ı âti’z-zikri tasdîka vekîl olduğu bi-mâ-hüve nehci’s-sübût şer‘an sâbit olan Mehmed Ağa b. Abdullah nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup Küçükçekmece kasabasına tâbi‘ Papasköyü demekle ma‘rûf karyede vâki‘ bir tarafdan Ali Efendi mülkü ve bir tarafdan Solakzâde Hüseyin Çelebi mülkü ve bir tarafdan Saime Hatun mülkü ve bir tarafdan tarîk-i âm ile mahdûd fevkānî iki bâb oda ve tahtında öküz ahırı ve bir anbar ve bir samanhâne ve bir kenîf ve zât-ı eşcâr-ı müsmire ve gayr-ı müsmireli bahçe ve havluyu müştemil mülk menzilimin nısfı ile içinde mevcûde olan bir çift kara sığır öküzümü bi-safkatin vâhidetin ile zevcem müvekkile-i mezbûre Fâtıma Hatun’a bey‘-i bâtt-ı sahîh-i şer‘î ile yüz elli guruşa bey‘ ve teslîm ve temlîk ol dahi ber-vech-i muharrer iştirâ ve tesellüm ve temellük ve kabz ve kabûl ettiğinden sonra semeni olan meblağ-ı mezbûr yüz elli guruş mutâlebesinden zevcem müvekkile-i mezbûre Fâtıma’nın zimmetini ibrâ-i âm ile ibrâ ve iskāt eyledim baʻde’l-yevm menzil-i mahdûd-ı mezkûrun nısfı ile içinde mevcûde bir çift kara sığır öküzü müvekkile-i mezbûre Fâtıma Hatun’un mülk-i müşterâsı ve hakk-ı sırfı olmuşdur keyfe mâ teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu Fî 17 min-Cumâdelâhire sene 1121 Şuhûdü’l-hâl: Mehmed Ağa b. Abdi, Süleyman Ağa b. el-Hâc Hüseyin, Mustafa Çelebi b. Şa‘ban, Hacı Hasan Ağa Silahdâr veznedârî, Receb b. Süleyman, Ahmed Efendi b. Mustafa el-İmâm, Osman b. Ali, Ahmed Çelebi b. Bayezid el-Müezzin ve gayruhum mine’l-huzzâr.