Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 336 Hüküm no: 360 Orijinal metin no: [49a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. Mustafa ile kızı Ayşe bt. Ali arasındaki emanet eşya ve veraset hissesi davasında birbirlerinin zimmetlerini ibra ettikleri Mahmiye-i İstanbul’da Kürkçübaşı Mahallesi sâkinelerinden olup zâtı ma‘rifet-i şer‘iyye ile ârifân el-Hâc Ali b. Abdullah ve Mehmed Çavuş b. Ali ta‘rîfleriyle mu‘arrefe olan Fâtıma bt. Mustafa nâm hatun meclis-i şer‘-i şerîf-i enverde ve mahfil-i dîn-i münîf-i ezherde kebîre kızı işbu râfi‘atü’l-vesîka Âişe bt. Ali nâm hatun muvâcehesinde bi-tav‘ihâ ikrâr ve takrîr-i kelâm edip kızım mezkûre Âişe’yi hâlâ zevci olan Bursevî Mehmed Çelebi b. Muslu nâm kimesneye tezvîc eylediğimde cihâz olmak üzere eşyâmdan sekiz kadife yasdık ve dört köhne minder ve biri çatma ve dördü yemenî yorgan ve sekiz sahan ve bir incili kuşak ve dört tencere ve bir leğen ma‘a ibrik ve bir kebîr sini ve bir güğüm ve bir orta keçesi ve bir çift bilezik ve bir çift zümrüd küpe ve bir inci küpe ve bir kebîr bakraç ve iki ocak yaşmağı ve bir köhne kaliçe ve bir döşek ve iki tepsi ve bir kahve ibriği ve bir seccâde ve bir hamam tası ve bir keyl kutusu ve iki şam‘dân ve beş gömlek ve iki minder çârşebi ve üç yağlık ve bir sim kebîr kuşak ve iki uçkur ve bir şerbet ibriği ve bir hoşâb tası ve bir kapı perdesi ve bir kahve tepsisi ve bir kefkir ve iki peşkir ve dört lengerî ve iki tâbemi kızım mezkûreye def‘ ü teslîm ol dahi ber-vech-i meşrûh ahz u kabz eyledikden sonra ben eşyâ-i muharrere-i mezkûreyi âriyeten vermişidim deyü kızım mezkûreden taleb ve da‘vâ ol dahi benden li-ebeveyn karındaşı olup fevt olan oğlum İsmail’den kendiye isâbet eden hisse-i irsiyyesini taleb ve da‘vâ eyledikde beynimizde nizâ‘-ı küllî vukū‘undan sonra beynimize muslihûn tavassut edip ben eşyâ-i muharrere-i mezkûre da‘vâsından ve sâir da‘vâdan kızım mezkûrenin zimmetini ve iki kıt‘a temessük nâtıka olduğu üzere zevci işbu Bursevî mezkûr Mehmed Çelebi zimmetinde hakkım olan yüz dokuz guruşdan mezkûr Mehmed Çelebi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim kızım mezkûre Âişe dahi müteveffâ-i mezbûr İsmail’den ve babasından kendiye isâbet eden hisse-i irsiyyesine ve sâir hukūka müte‘allika da‘vâdan benim zimmetimi ibrâ ve iskāt eyledi baʻde’l-yevm husûs-ı mezkûra müte‘allika birbirimiz ile aslâ ve kat‘â da‘vâ ve nizâ‘ımız kalmamışdır dediklerinde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: Hasan Efendi İmâm-ı Nevbahâr, Veli Efendi el-Hatîb, Mehmed Çelebi b. Abdullah, Ahmed Çelebi b. Abdullah, diğer Mehmed Çelebi, Mehmed Çavuş b. Ali, el-Hâc Ali b. Abdullah, Osman Çavuş b. Ebûbekir ve gayruhum mine’l-huzzâr.