Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 337 Hüküm no: 361 Orijinal metin no: [49b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Çelebi b. Mehmed’in Karabaş Mahallesi’ndeki iki evini istiğlal yoluyla Solakzâde Mehmed Ağa b. Hüseyin’e satıp tekrar kiraladığı Mahmiye-i İstanbul’da Karabaş Mahallesi’nde sâkin sin ve cüssesinin bülûğa tahammülü olup ve bülûğunu meclis-i şer‘de mu‘terif olan Mehmed Çelebi b. Mehmed nâm şâbb-ı emred meclis-i şer‘-i şerîf-i enverde işbu râfi‘u’l-kitâb Solakzâde Mehmed Ağa b. Hüseyin nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan Müezzin Hasan Halîfe mülkü ve bir tarafdan Kamile nâm hatun mülkü ve bir tarafdan benim tasarrufumda olan vakıf menzil ve bir tarafı tarîk-i âm ile mahdûd büyût-ı adîdeyi müştemil menzil ile yine mahalle-i mezbûrede vâki‘ bir tarafdan benim âhar menzilim ve bir tarafdan Hadice Hatun mülkü ve bir tarafdan Hâfız Paşa bostanı ve bir tarafdan baʻzan Nakkāş Mustafa Çelebi mülkü ve baʻzan tarîk-i âm ile mahdûd ve kezâlik büyût-ı adîdeyi müştemil mülk menzillerimi bi-safkatin vâhidetin merkūm Mehmed Ağa’ya bi-tarîkı’l-istiğlâl yüz elli guruşa bey‘ ve teslîm ol dahi ber-vech-i muharrer iştirâ ve kabz ve kabûl eylediğinden sonra semeni olan meblağ-ı mezbûr yüz elli guruşu mezbûr Mehmed Ağa yedinden tamamen ahz u kabz eylediğimden sonra menzileyn-i mezkûreyni ba‘de’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan bir sene tamamına değin yine mezbûr Mehmed Ağa bana yirmi bir guruş ve bir rubu‘ guruşa îcâr ve teslîm ben dahi istîcâr ve kabz ve kabûl eyledim dedikde gıbbe’t-tasdîkı’ş-şer‘î mezbûr Mehmed Çelebi meclis-i mezkûrda Monla Halil b. Yusuf mahzarında ikrâr ve takrîr-i kelâm edip meblağ-ı mezbûr zimmetimde deyn ve menzileyn-i mezbûreyn hakīkatde rehin olmağla müddet-i mezkûre tamamında meblağ-ı mezbûr ile ücret-i mezkûrun edâsı müyesser olmaz ise menzileyn-i mezkûreyni semen-i misli ile âhara bey‘ ve kabz-ı semen ve semen-i mezbûrdan deyn-i mezbûru edâya akd-i rehnde meşrûta kemâ-azeltüke fe-ente vekîlî mazmûnu üzere azl ve in‘izâlden masûne vekâlet-i devriye ile mezbûr Monla Halil’i vekîl ve nâib-i menâb nasb u ta‘yîn eylediğimde ol dahi vekâlet-i mezbûreyi kabûl ve merâsimini kemâ-yenbagī edâya ta‘ahhüd eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 14 min-Cumâdelâhire sene 1121 Şuhûdü’l-hâl: Mehmed Efendi b. Ahmed, Mustafa Çelebi b. Mehmed, Mehmed b. Mustafa, Ali Çelebi b. Receb, el-Hâc Mehmed b. Yusuf, Ahmed Efendi b. Osman, İbrahim Ağa b. Mehmed, Mehmed b. Ahmed, Yusuf b. Ali, Abdullah b. Abdullah, Hüseyin b. Hasan ve gayruhum mine’l-huzzâr.