Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 338 Hüküm no: 362 Orijinal metin no: [49b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. İsmail’in Ali Beşe b. Ali’ye olan borcunu taksitler halinde ödemesi Mahmiye-i İstanbul’da Sultan Selim Câmi‘-i şerîfi kurbünde sâkin İbrahim b. İsmail nâm kimesne mahfil-i kazâda işbu bâ‘isü’l-kitâb Ali Beşe b. Ali nâm kimesne mahzarında ikrâr ve takrîr-i kelâm edip mezbûr Ali Beşe’ye cihet-i deyn-i şer‘îden on iki guruş deynim olup lâkin meblağ-ı mezbûru hâlâ ve def‘aten edâya iktidârım olmamağla te’cîl ve taksîte tâlib olduğumda beher şehr kendiye otuzar para verip târih-i kitâbdan on altı ay tamamına değin kendiye tamamen edâ etmek üzere beni te’cîl ve taksît eylediğinde ben dahi ber-vech-i muharrer te’cîl-i mezkûru kabûl ve minvâl-i muharrer üzere edâya ta‘ahhüd eyledim dedikde gıbbe’t-tasdîkı’ş-şer‘î mezbûr İbrahim’in zevcesi Rahime bt. Mustafa nâm hatun meclis-i mezbûrda merkūm Ali Beşe mahzarında ikrâr ve takrîr-i kelâm edip meblağ-ı mukassat-ı mezkûra tarafeynden emr ve kabûlü hâviye kefâlet-i sahîha-i şer‘iyye ile ben dahi kefîl olup ve mezbûre Rahime’nin nefsine ve hîn-i mutâlebede meclis-i şer‘a ihzârına Mustafa b. Bayram dahi kefîl oldum dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. [Fî] 15 min-Cumâdelâhire sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli ve gayruhum mine’l-huzzâr.