Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 338 Hüküm no: 363 Orijinal metin no: [49b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kirkor v. Marko’nun çeşitli eşya bedelinden Seyyid Hacı Ebûbekir b. Hacı Ali’de kalan alacağını Hacı Bekir’e olan borcuna mahsup ettiği Tüccâr tâifesinden olup mahmiye-i İstanbul’da Vezîr Hanı’nda sâkin Çâşıd Kirkor v. Marko nâm zimmî meclis-i şer‘-i şerîf-i enverde işbu râfi‘u’l-kitâb es-Seyyid el-Hâc Ebûbekir b. el-Hâc Ali nâm kimesne mahzarında ikrâr ve takrîr-i kelâm edip eşyâ-i memlûkemden elli çift Kayseriye yemenisi ve on beş Karaman bezi tâʻbir olunur bezi ve yirmi dört sancak astarımı bi-safkatin vâhidetin tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr es-Seyyid Ebûbekir Çelebi’ye doksan guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr doksan guruşun yirmi guruşunu yedinden ber-vech-i nakd ahz u kabz edip bâkī yetmiş guruşu dahi zimmetimde mezbûr es-Seyyid el-Hâc Ebûbekir Çelebi’ye cihet-i deyn-i şer‘îden bâ-hüccet-i şer‘iyye deynim olan yüz on yedi guruşun yetmiş guruşuna takās eylediğinde ben dahi mukāssa ve kabûl eyledim baʻde’l-yevm eşyâ-i muharrere-i mezkûre mezbûr es-Seyyid el-Hâc Ebûbekir Çelebi’nin mülk-i müşterâsı olmuşdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 18 min-Cumâdelâhire sene 1121 Şuhûdü’l-hâl: Çavuşzâde el-Hâc Mehmed b. İdris, Hüseyin Çelebi b. Hasan, Molla Mehmed Çelebi b. İbrahim, Hüseyin Beşe b. Abbas, Hasan Çelebi b. Mustafa, Ali Çelebi b. Bâli, Süleyman Çelebi b. Abdullah, Ali Çelebi b. İvaz ve gayruhum mine’l-huzzâr.