Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 339 Hüküm no: 364 Orijinal metin no: [49b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Aleksan v. Mardiros’un kefalet parasını ödediği Mesail v. Ananya’nın Aleksan’a borcunu ödemesinin tenbihi Sarraf tâifesinden olup Vâlidehanı’nda müsâferet vechi üzere sâkin Aleksan v. Mardiros nâm Ermeni meclis-i şer‘-i şerîf-i enverde ekmekçi tâifesinden Mesail v. Ananya nâm Ermeni muvâcehesinde üzerine da‘vâ ve takrîr-i kelâm edip mezbûr Mesail’in gāib ani’l-meclis Zeytincizâde Halil nâm kimesneye yüz guruş deyni olup meblağ-ı mezbûra ben tarafeynden emr ve kabûlü hâviye kefâlet-i sahîha-i şer‘iyye ile kefîl olup meblağ-ı mezbûru kefâletime binâen merkūm Halil benden ahz u kabz etmekle hâlâ meblağ-ı merkūm yüz guruşu mezbûr Mesail’den bi’l-mürâca‘a taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl merkūm Mesail cevâbında fi’l-hakīka kaziyye vech-i muharrer üzere olup cihet-i mezbûreden müdde‘î-i mezbûr Aleksan’a el-ân edâsı lâzım yüz guruş zimmetimde deynim vardır deyü ikrâr u i‘tirâf etmeğin alâ-mûcebi i‘tirâfihî meblağ-ı mezbûr yüz guruşu müdde‘î-i merkūm Aleksan’a redd ü teslîme merkūm Mesail’e tenbîh olunup mâ-vaka‘a bi’t-taleb ketb olundu. Fî 16 min-Cumâdelâhire sene 1121 Şuhûdü’l-hâl: İbrahim Çelebi b. Halil, Abdullah Çelebi b. Mehmed, Mustafa Çelebi b. Şa‘ban, Ali Çelebi b. İvaz ve gayruhum mine’l-huzzâr.