Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 340 Hüküm no: 366 Orijinal metin no: [50a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim Ağa b. Mehmed b. Abdullah’ın istiğlal yoluyla Fâtıma Hatun Vakfı’na satıp tekrar kiraladığı evinin vakfa olan borcunu ödeyemediği için Halil Ağa b. Hüseyin’e satıldığı Mahmiye-i İstanbul’da Tevkī‘î Ca‘fer Mahallesi’nde sâkin İbrahim Ağa b. Mehmed b. Abdullah tarafından vech-i âtî üzere vekâleti sâbite olan Zol? Mehmed Çelebi b. Mustafa nâm kimesne mahfil-i kazâda işbu râfi‘u’l-kitâb Halil Ağa b. Hüseyin mahzarında bi’l-vekâle ikrâr ve takrîr-i kelâm edip mezbûr İbrahim Ağa yedinde olan hüccet nâtıka olduğu üzere mahalle-i mezbûrede vâki‘ bir tarafdan el-Hâc İsa Vakfı’ndan Fâtıma Hatun tasarrufunda olan menzil ve bir tarafdan Âişe bt. Mustafa Efendi menzili ve bir tarafdan İbrahim Ağa menzili ve bir tarafdan tarîk-i âm ile dâhilen ve hâricen büyût-ı adîde ve bahçeyi müştemil menzilini mahmiye-i mezbûrede vâki‘ Fâtıma Hatun Vakfı’na meşrûtiyet üzere mütevellî olan Abdullah Efendi b. eş-Şeyh Ali Efendi’ye bin yüz yirmi bir senesi Saferi’l-hayr’ın dördüncü gününde bi-tarîkı’l-istiğlâl beş yüz yirmi yedi guruşa bey‘ ve teslîm ol dahi ber-vech-i muharrer iştirâ eyledikden sonra menzil-i mezbûru ba‘de’t-tahliyyeti’ş-şer‘iyye ve’t-tekābuzi’l-mer‘î târih-i mezbûrdan altmış bir gün tamamına değin on beş guruşa yine mezbûr İbrahim Ağa’ya îcâr ol dahi istîcâr ve kabûl eyledikden sonra mezbûr İbrahim Ağa eğer asl-ı mâl-ı mezbûr beş yüz yirmi yedi guruşu ve ücret-i mezbûre on beş guruş ki cem‘an beş yüz elli iki guruş deynini müddet-i mezbûre tamamında edâ edemezse semen-i misli ile âhara bey‘ ve kabz-ı semene ve semeninden deyn-i mezbûru edâ ve fazla kalır ise kendiye îsâle tarafından vekâlet-i devriye ile beni vekîl ben dahi kabûl ettiğimden sonra müddet-i mezkûre mürûr edip mezbûr İbrahim Ağa deyn-i mezbûru edâ etmemekle mütevellî-i mezbûr yedinde olan hüccet-i uhrâ nâtıka olduğu üzere huzûr-ı hâkimü’ş-şer‘de benimle murâfa‘a ve ber-vech-i muharrer vekâletimi isbât ve baʻde’l-hükm-i hâkim-i müşârun-ileyh menzil-i mezbûru semen-i misli ile âhara bey‘a bana tenbîh etmeğin ben dahi menzil-i mezbûru hâssa münâdîlerinden Hâfız Mehmed yediyle sûk-ı sultânîde ve mecma‘-ı nâs olan mahallerde kırk bir gün mikdârı nidâ ve müzâyede olunup ragabât-ı nâs bi’l-külliye münkatı‘a ve sekiz yüz beş guruşda merkūm Halil Ağa üzerinde karâr edip ziyâde ile tâlib-i âhar dahi zuhûr etmeyip <> ve meblağ-ı mezbûr menzil-i mezbûrun el-yevm semen-i misli idiği zeyl-i kitâbda muharrerü’l-esâmî Müslimîn ihbârlarıyla müte‘ayyin oldukdan sonra menzil-i mezbûru bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i kat‘î ile vekâlet-i mahkiyem hasebiyle mezbûr Halil Ağa’ya sekiz yüz beş guruşa bey‘ ve temlîk ve teslîm eylediğimde ol dahi vech-i meşrûh üzere iştirâ ve tesellüm ve temellük ve kabz ve kabûl eylediğinden sonra semeni olan meblağ-ı mezbûr sekiz yüz beş guruşu mezbûr Halil Ağa yedinden ahz u kabz eyledim baʻde’l-yevm menzil-i mahdûd-ı mezkûr merkūm Halil Ağa’nın mülk-i müşterâsı ve hakk-ı sırfı olmuşdur keyfe mâ yeşâ mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 13 min-Cumâdelâhire sene 1121 Şuhûdü’l-hâl: Osman Efendi b. Mehmed el-İmâm, Ömer Efendi b. Şükrullah, el-Hâc Ahmed Efendi b. Yusuf, Ahmed Efendi b. Mehmed, Mustafa Çelebi b. Mehmed, Ömer Çelebi b. Ahmed, Halil Ağa b. Mehmed, Ali Ağa b. Yusuf, Mehmed Efendi b. Şa‘ban, Musa Çelebi b. İbrahim, Mustafa Çelebi b. Ali ve gayruhum mine’l-huzzâr.